विराटनगर : प्रदेश १ का सांसदहरुलाई पनि दशैँ खर्च दिने तयारी भईरहेको पाईएको छ ।
प्रदेशसभाबाट पारित प्रदेशसभाका पदाधिकारी तथा सदस्यको पारिश्रमिक तथा सेवासुविधा सम्बन्धी ऐनमा दशैँ खर्च पाउने ब्यबस्था उल्लेख नभएपछि संसद सचिवालयले दशैँ खर्च पाउनेगरी कानुनी बाटो खोलदिन आन्तरिक मामिला तथा कानुन मन्त्रालयलाई पत्राचार गरेको हो ।
प्रदेशसभाका पदाधिकारी तथा सदस्यको सेवा सुविधासम्बन्धी ऐनमा प्रत्येक महिना पारिश्रमिक तथा अन्य सेवा सुविधा पाउने ब्यबस्था छ । तर त्यसमा चाडपर्व खर्च पाउने वा नपाउने भन्ने कुरा स्पष्ट छैन ।
सांसदहरुले दशैँ खर्च लिनका लागि ऐननै संसोधन गर्नुपर्ने बाध्यात्मक अवस्था देखिएपछि संसद सचिवालयले आन्तरिक मामिला तथा कानुन मन्त्रालयलाई राय माग्दै पत्राचार गरेको हो ।
सचिवालयले असोज १९ गते लेखेको पत्रमा आर्थिक मामिला तथा योजना मन्त्रालयलाई समेत बोधार्थ दिईएको छ । ऐनमा स्पष्ट ब्यबस्था नभएको भन्दै पत्रमा स्पष्ट निर्णय गरिदिन दुवै मन्त्रालयलाई अनुरोध गरिएको छ ।, यो समाचार आजको उद्घोष दैनिकमा छापिएको छ ।
