काठमाडौँ, असोज २९
नारायणहिटी दरबार सङ्ग्रहालयमा रहेको शाहवंशीय राजाहरुले लगाउने श्रीपेच अवलोकन गरी प्रधानमन्त्री ओलीले उद्घाटन गरेका छन् । सोमबार नारायणहिटी पुगेर ओलीले श्रीपेचको अवलोकन गरी उद्घाटन गरेसँगै अब सर्वसाधारणका लागि पनि खुला भएको छ ।
नारायणहिटी दरबार हेर्न जाने जो कोहीले पनि अब श्रीपेचको अवलोकन गर्न पाउने भएका छन् । नारायणहिटी दरबार सङ्ग्रहालयको सुर्खेत र रुपन्देही कक्षमा श्रीपेच हेर्न सकिने छ ।
श्रीपेचका साथमा राजदण्ड, तत्कालीन रानीको मुकुट, तरबार, झारी, चमरलगायत सामग्री पनि अवलोकनका लागि राखिएको पुरातत्व विभागका महानिर्देशक भेषनारायण दाहालले जानकारी दिए ।
२०२८ सालमा यो श्रीपेच पूर्वराजा विरेन्द्रका लागि तयार गरिएको थियो । प्रेमलाल श्रेष्ठले यसको निर्माणको जिम्मा लिएका थिए । तत्कालीन राजा ज्ञानेन्द्र शाहले दरबार छाडेसँगै श्रीपेचलाई दरबारको सैलुन कक्षमा राखिएको थियो ।
नारायणहिटी दरबार सङग्रहालय २०६५ फागुन १६ गतेबाट सर्वसाधारणका लागि अवलोकन गर्न खुला गरिएको थियो भने अब महत्वपूर्ण मानिने दरबारिया समाग्रीहरुको पनि अवलोकनका लागि खुला गरिएको छ ।
