काठमाडौँ, कात्तिक ८
घटस्थापनादेखि प्रदर्शनमा उत्रिएको ‘छक्का पञ्जा ३’ को दुई हप्ते कलेक्सन रिपोर्ट बाहिर आएको छ । निर्माण टिमका एक सदस्यले दिएको जानकारी अनुसार फिल्मले प्रदर्शनको दुई हप्तामा १३ करोड ६० लाख ग्रस कलेक्सन गरेको छ ।
२ करोड आसपासमा निर्माण भएको फिल्मले प्रदर्शनको पहिलो हप्तामा नै लगानी सुरक्षित गरेर नाफातर्फ आफूलाई र्डोयाएको थियो ।
वर्ष २०७५ को मध्यान्तरसम्ममा सरदर ५० बढी फिल्म रिलिज भएपनि २ – ३ फिल्मले मात्र नाफा कमाए् । बाँकी फिल्मले लगानी सुरक्षित गर्न समेत सकेनन् । आधा वर्षमा निर्माताको करीब ८० देखि ९० करोड डुबिसकेको छ । वर्षको अन्त्यसम्ममा यो हिसाब अझै बढ्नेछ ।
‘रामकहानी’ र ‘इन्टु मिन्टु लण्डनमा’ले औसत व्यापार गर्यो भने वर्षको पहिलो हिट फिल्म बनेको थियो ‘नाईं नभन्नू ल ५’ । फुलपातीदेखि प्रदर्शनमा आएको फिल्म‘जय भोल’ले पनि लगानी सुरक्षित गरेको छ । बुधवार निर्माता तथा निर्देशक अशोक शर्माका अनुसार फिल्मले पहिलो हप्तामा ३ करोडमाथि कमाइसकेको छ ।
‘छक्का पञ्जा ३’ सँगै निर्देशक निरौलाले हिट फिल्ममा ह्याट्रिक मारेकी छन् । सरकारी स्कुलमा हुने बेथितिमाथि प्रहार गरिएको फिल्मलाई दीपाश्री निरौलाले निर्देशन गरेकी हुन् ।
प्रदर्शनको दुई दिनमा नै यो फिल्मले २ करोडमाथि कमाएको थियो । अब यो फिल्म ‘छक्का पञ्जा’ को १६ करोडको एतिहासिक कलेक्सन रेकर्ड ब्रेक गर्ने दौडमा छ । सफल होला वा असफल ? यो भने हेर्न बाँकी छ ।
फिल्ममा दीपकराज गिरी, दीपिका प्रसाईँ, केदार घिमिरे, जितु नेपाल, बुद्धि तामाङ, शिवहरि पौडेलको हास्यकलाकारको जम्बो टोलीसहित दीपिका प्रसाईँ, प्रियंका कार्की, स्वस्तिमा खड्का, बर्षा राउत, संजोग कोइरालालगायतको अभिनय रहेको छ ।
