काठमाडौं, मंसिर ३
जारी पल्सर सहिद स्मारक ए डिभिजन लिगअन्तर्गत आज भएको पहिलो खेलमा सीएमजी क्लब संकटाले जावलाखेल युवा क्लबलाई २–० ले पराजित गरेको छ । संकटाको जितमा सेड्रिक अबाले २ गोल गरे ।
खेलको १९ औं मिनेटमा पहिलो पहेंलो कार्ड पाएको एक मिनेट नबित्दै एलोन म्याक्सवेलले दोस्रो पहेंलो कार्ड पाएपछि संकटा १० खेलाडीमा सिमित भएको थियो ।एलोनले जावलाखेलका डिफेन्डर अडामा डुम्बियालाई लगातार फल हानेका थिए । दुवै टोलीले पहिलो हाफमा आक्रमक मुभ बनाउन सकेनन् ।
खेलको दोस्रो हाफको सुरुवातमै जावलाखेलले अग्रता लिने मौका पाएको थियो तर त्यसलाई कुलदीपले गोलमा परिणत गर्न सकेनन् । कुलदीप कार्कीको फ्रिकिकमा डुम्बियाको हेडरलाई संकटाका गोलरक्षक राजाबाबु थापाले सुन्दर बचाउ गरे । खेलको ५८ औं मिनेटमा संकटाले अग्रता लियो । सुभाष गुरुङको कटब्याकमा सेड्रिक अबाले पेनाल्टी क्षेत्रभित्रबाट गोल गर्दै अग्रता दिलाए ।
अबाले नै ८५ औं मिनेटमा संकटाको अग्रता दोब्बर पारे । लक्ष्मण रुचालले दिएको पासमा अबाले ६ यार्ड बक्सबाट ब्याकहिलमा गोल गरे । लगातार दोस्रो जित दर्ता गरेको संकटा अंक तालिकाको तेस्रो स्थानमा उक्लिएको छ ।
