विराटनगर,मंसिर ६
लामो पर्खाईपछि अब विराटनगरबाटै माउन्टेन फ्लाइट हुने भएको छ । माउन्टेन फ्लाईटको मंसिर ८ गते शनिबार उद्घाटन गर्ने कार्यक्रम तय गरिएको छ ।
माउन्टेन फ्लाइटको आन्तरिक मामिला तथा कानुन मन्त्री हिक्मत कार्की, सामाजिक विकास मन्त्री जिवन घिमिरे, उद्योग पर्यटन वन तथा वातावरण मन्त्री जगदीश कुसियत, आर्थिक मामिला तथा योजना मन्त्री इन्द्रबहादुर आङ्बोको उपस्थितीमा मुख्यमन्त्री शेरधन राईले उद्घाटन गर्ने कार्यक्रम रहेको छ ।
प्रदेश नम्बर १ को ‘विराट होलिडेज’ले यही शनिबारदेखि हरेक शनिबार माउण्टेन फ्लाइट गराउन लागेको हो । पर्यटन तथा होटल व्यवसायीहरूले यति एयरलाईन्ससँगको सहकार्यमा माउण्टेन फ्लाइट उडाउन लागेको विराट होलिडेजका अध्यक्ष भविषकुमार श्रेष्ठले जानकारी दिए ।
पहिलो चरणमा एक नम्बर प्रदेशका नागरिकलाई लक्षित गरिएको छ । त्यस्तै बोर्डर आसपास भारतको बिहार, बंगाल र सिक्कीमका पर्यटक लक्षित गरि उडान गर्न लागिएको श्रेष्ठले जानकारी दिए ।
प्रति ब्यक्ति ९ हजार ९ सयमा ५५ मिनेटको माउण्टेनको आनन्द लिन सकिने गरी तयारी थालिएको हो । एउटा माउण्टेन फ्लाईटमा १९ जनालाई उडाइने र कन्जनजंघा, मकालु र सगरमाथाको दृश्यावलोकन गर्न सकिनेछ ।
