विराटनगर, पुस २८
मारवाडी युवा मञ्चले विराटनगरमा चङ्गा प्रतियोगिता आयोजना गरेको छ । विराटनगर २ शंकरपुरस्थित खुल्ला चौरमा आयोजना गरिएको प्रतियोगितामा ३ दर्जन चङगा उडाउने समूह सहभागि भएका छन् ।
प्रतियोगितात्मक सो प्रतिस्पर्धामा विराटनगरका महेन्द्र सिंघी र कमल सिंघानियाको समूह प्रथम र दिनेश चौरडिया तथा कमल डाँगाको समूह दोश्रो भएको छ । विजयीलाई संघीय संसदका सांसद मोती दुगडले पुरस्कार वितरण गरे । बिजयी समूहलाई शिल्ड र प्रमाणपत्र प्रदान गरिएको प्रतियोगिता संयोजक मधुर दुगडले बताए ।
मारवाडी समूदायले माघे संक्रान्तिको अवसरमा चङगा उडाएर मनोरंजन गर्ने पारम्परिक प्रचलन अनुसार विराटनगरमा पहिलो पटक प्रतियोगिता आयोजना गरिएको मारवाडी युवा मञ्च विराटनगरका अध्यक्ष शेरसिंह दुगडले बताए ।
आगामी दिनहरुमा प्रतियोगितालाई थप ब्यवस्थित गर्दै लगिने आयोजकले जनाएको छ । प्रतियोगिता आयोजनास्थलमा मारवाडी संस्कृति अनुसारको खानपानको स्टल समेत राखिएको थियो । पहिलो पटक आयोजना गरिएको चङगा प्रतियोगितामा उल्लेखीय सख्यामा मारवाडी समूदायको सहभागिता रहेको थियो ।
