विराटनगर, माघ २
प्रदेश नम्बर १ को हिउँदे अधिवेशन माघ २० गतेबाट सुरु हुने भएको छ । बुधबार बसेको प्रदेश सरकारको मन्त्रिपरिषद्को बैठकले २० गतेदेखि अधिवेशन सुरु गर्ने मिति तय गरेको हो ।
सरकारको सिफारिसमा अब प्रदेश प्रमुख गोविन्दबहादुर ताम्बाहाङले अधिवेशन आह्वान गर्नेछन । प्रदेश सभाको बर्खे अधिवेशन गत असोज २३ गतेसम्म चलेको थियो ।
प्रदेशको नाम र राजधानी तोक्न सरकारले गृहकार्यसमेत सुरु गरेकोले यो अधिवेशनलाई निकै महत्वका साथ हेरिएको सरकारका प्रवक्ता समेत रहेका आन्तरिक मामिला तथा कानुन मन्त्री हिक्मतकुमार कार्कीले बताए ।
गत असोज २३ गते वर्षे अधिवेशन सम्पन्न भएदेखि हिउँदे अधिवेशन सुरु हुन सकेको छैन । यसैबीच मन्त्री परिषद्को बैठकले कोसी रिफ्रेसमेन्ट आयोजनाका लागि बजेट विनियोजन गरेको छ ।
आर्थिक मन्त्रालयको विशेष पहलमा सुनसरीको कोसी गाउँपालिकामा लामो दूरीका सवारी साधनका चालकहरुका लागि थकान मेटाउन, ट्राफिक सचेतना तथा होल्डेजका रिफ्रेसमेन्टका लागि रिफ्रेसमेन्ट आयोजना सन्चालन गरिने भएको हो ।
यस्तै बैठकले आन्तरिक मामिला तथा कानून मन्त्रालयले अघि सारेको सगरमाथा टिन्स क्लबको गठन तथा निर्देशिका पनि स्वीकृत गरेको छ । यो क्लबले कक्षा ९ देखि १२ सम्मका विद्यार्थीहरुका लागि विभिन्न किसिमका तालिम तथा प्रशिक्षण दिने जनाइएको छ ।
‘म अघि बढ्छु’ भन्ने नारासहितको कार्यक्रमले सामुदायिक तथा संस्थागत विद्यालयमा लागू औषधसम्बधी अभिमुखी कार्यक्रमलाई विशेष प्राथमिकतामा राख्ने मन्त्री कार्कीले जानकारी दिए । बैठकले मुख्यमन्त्री ग्रामीण सडक सुधार आयोजना, प्रदेशको भूमि व्यवस्था, प्रदेश पर्यटन विकास विधेयक लगायतका विषयमा पनि निर्णय गरेकोे प्रदेश १ सरकारका प्रवक्ता समेत रहेका आन्तरिक मामिला मन्त्री कार्कीेले बताए ।
