विराटनगर, फागुन ४
प्रदेश १ का विभिन्न जिल्लाका जनप्रतिनिधीहरुले बजारमा श्रमिकको माग र आवश्यकता अनुसार तालिम र प्रशिक्षण कार्यक्रम सञ्चालन गर्न प्रदेश सरकारलाई सुझाव दिएका छन् । आर्थिक समृद्धि र विकासको लक्ष्य पूरा गर्न भूउपयोग नीति अनुरुप माटो र बजारको माग अनुसार युवा लक्षित स्वरोजगार तालिम तथा प्रशिक्षण दिन उनीहरुले प्रदेश १ सरकारलाई सुझाव दिएका हुन् ।
प्रदेश एक सामाजिक विकास मन्त्रालयले शुक्रबार विराटनगरमा आयोजना गरेको तालिम तथा प्रशिक्षणका लागि आयोजना गरेको सुझाव संकलन गोष्ठीमा सहभागि जनप्रतिनिधिहरुले प्रदेश सरकारलाई यस्तो सुझाव दिएका हुन् । छोटो अवधिको सिपमुलक तालिम संचालनकालागि प्रदेश एकका प्रदेशसभा सदस्य र स्थानिय तहका प्रमुख, उपप्रमुखलाई सहभागि गराएर गरिएको सुझाव संकलन कार्यक्रममा सहभागिले आगामी दिनमा सञ्चालन गरिने तालिमहरु उपलब्धिमुलक बनाइनुपर्नेमा जोड दिएका थिए ।
प्रदेशसभा सदस्य काजीमान राईले इलाम लगायतको क्षेत्रमा कफी खेती र प्रशोधनका बिषयमा तालिम सञ्चालन गर्न सकिए उपलब्धिमुलक हुने बताए । उनले त्यस्तो तालिमले युवाहरुलाई स्वरोजगार हुन सघाउ पुग्ने बताए । रतुवामाई नगरपालिकाका प्रमुख रबिन राईले तालिम सञ्चालन गर्दा पुरानै पद्धति नदोहरियोस भन्ने विषयमा बिचार गर्नुपर्ने बताए ।
उनले प्रदेश सरकारले तालिम सञ्चालन गर्दा स्थानिय तहसंग समन्वय गर्नुपर्ने सुझाव दिए । झापाको कन्काई नगरपालिकाका प्रमुख राजेन्द्र पोखरेलले स्थानिय परिवेश र आवश्यकता अनुसार तालिम सञ्चालन गरिनुपर्ने बताए । उनंले कुनै एकठांउँमा आवश्यक हुने तालिम अर्को ठांउमा आवश्यक रहने नरहेको विचार गरेर मात्र सञ्चालन गर्नुपर्ने बताए । यस्तै गौरादह नगरपालिकाका प्रमुख रमेश साहले उपलब्धीमुलक तालिम सञ्चालन गर्नुपर्ने बताए ।
प्रदेश सरकारले आउदो असार मसान्त भित्र सिटिईभिटी मार्फत ६ हजार र प्रदेश सरकारबाट १ हजार ब्यक्तिलाई सिपमुलक तालिम सञ्चालन गर्ने निति अनुसार तालिम सञ्चालन गर्नु अघि सुझाव संकलन गरेको हो । तालिममा प्रदेश एकका सामाजिक विकास मन्त्री जीवन घिमिरे र सिटिईभिटीका प्रदेश कार्यालय प्रमुख डाक्टर शिवप्रसाद ढकाल समेतको सहभागिता थियो ।
