विराटनगर, फागुन २५
यही फागुन २८ गतेदेखि विराटनगरमा हुने महिला साफ च्याम्पियनसिपलाई मध्यनजर गर्दे निर्माण गरिएका सडकहरुको अनुगमन गरिएको छ । जिल्ला प्रशासन कार्यालय मोरङ, विराटनगर महानगरपालिका लगायत सरोकारवाला निकायले संयुक्त रुपमा अनुगमन गरेका हुन । अनुगमानका क्रममा ९५ प्रतिशत निर्माण सम्पन्न भएको देखिएको टोलीले जनाएको छ ।
यस्तै खेलाडी, प्रशिक्षक, आगन्तुक बस्ने होटलहरु जादा प्रयोग गरिने सडकको पनि अनुगमन गरिएको छ । जसमा जेनियल आसपास, मुख्य राजमार्ग, डिएसपी रोड, गोश्वारा रोड, सहिद मैदानका आसपासका रोडहरुको अनुगमन गरिएको छ । यस्तै केही बाइपास रोडहरुलाई २ दिन भित्रमा गाडी हिडन सक्ने गरी मर्मत गर्न पनि टोलीले निर्देशन दिएको छ ।
यस्तै सिक्स लेन परियोजनालाई पनि खाल्डाखुल्डी पुरेर सम्म बनाउन आग्रह गरिएको छ । अनुगमनमा मोरङका प्रमुख जिल्ला अधिकारी रमेश केसी, महानगरका मेयर भीम पराजुली लगायतको सहभागिता रहेको थियो ।
