विराटनगर, चैत १
जन्मसिद्ध नागरिकका सन्तान भएकै कारण उमेर पुगेर पनि नागरिकता पाउन नसकेको भन्दै विराटनगरमा रिले अनशन बसिरहेका युवाहरुको मागमा समर्थन गर्दै राष्ट्रिय विद्यार्थी संघले ऐक्यवद्धता जनाएको छ ।
रष्ट्रिय जनता पार्टी (राजपा) निकट विद्यार्थी संगठन राष्ट्रिय विद्यार्थी संघ मोरङका अध्यक्ष विपुल झा अनसन स्थलमै पुगेर नागरिकता पिडित युवाहरुको समर्थनमा ऐक्यवद्धता जनाएका हुन् ।
अध्यक्ष झाले जन्मका आधारमा नागरिकता लिएका अभिभावकका धेरै सन्तान नागरिकताविहीन बन्नु परेको र राज्य यस विषयमा संवेदनशील नभएको भन्दै समर्थन जनाएको बताए ।
उनले जन्मसिद्धका आधारमा २०६३ सालमा नागरिकता पाएका अभिभावकका धेरै सन्तान उमेर पुगेर पनि लामो समयदेखि नागरिकताविहीन बन्नु परेको दावी गरे ।
उनले नागरिकता पीडितहरुले लामो समयदेखी नागरिकता प्राप्तीका लागि विभिन्न चरणबद्ध आन्दोलन गरेपछी सरकारले वेवास्ता गरिरहेका कारण पीडितहरुको अधिकार प्राप्तीका लागि साथ दिएको बताए ।
युवाहरु नागरिकता पीडित संघर्ष समितिको अगुवाइमा आमाको नामबाट नागरिकता र जन्मसिद्धका सन्तानलाई वंशजको आधारमा नागरिकता दिइनु पर्ने, महिला र पुरुषबीचको विभेदको अन्त्य हुनुपर्ने, सर्वोच्च र उच्च अदालतको परमादेशको पालना हुनुपर्ने लगायतका माग गर्दै अनसन बसेका हुन् ।
२०४६ साल अघि जन्मिएका जुनसुकै नेपाली नागरिकलाई २०६३ सालमा जन्मका आधारमा नागरिकता दिइएको थियो । २०६३ मा जन्मसिद्ध नागरिकता लिएकाका सन्तानले भने अहिले वंशजको नागरिकता पाउन नसकेका हुन् ।
