विराटनगर : मोरङको बेलबारी नगरपालिका– ४ का योगेन्द्र गुरुङले विवाह गर्न दवाव दिएका कारण रमिला राईको हत्या गरेको बयान दिएका छन् ।गत फागुन १७ गते बेपत्ता भएकी राईको शव चैत १३ गते सप्तकोशीमा भेटिएको थियो । हत्या आरोपमा पक्राउ परेका गुरुङले विवाह गर्ने विषयमा विवाद हुँदा मुख थुनेर हत्या गरेको बयान दिएका हुन् ।
प्रहरीसँगको बयानका क्रममा ६ वर्षसम्म प्रेममा रहेको बताएका गुरुङले बिहेको दवावका कारण हत्या गरेको बताए । फागुन १७ गते बेलुका गुरुङले बा १५ च ७९१६ नम्बरको कारमा रमिलासँगै जलिना र विक्रम राईलाई लिएर विराट चोकमा रहेको होटलमा गए ।
राति करिब ११ बजेसम्म नाचगान गरी योगेन्द्रकै घर फर्किए । मापसे गरेकी रमिलालाई योगेन्द्रले दुबै हातले मुख थुनेर हत्या गरे । उनको हत्या भएपछि शवलाई गाडीको डिकीमा हालेर सप्तकोशीमा लगेर फालेको प्रहरीले जनाएको छ ।, यो समाचार आजको उद्घोष दैनिकमा छापिएको छ ।
