एजेन्सी, बैशाख १९
भेनेजुएलाका विपक्षी नेता हुँवा गुवाइदोले शृङ्खलावद्ध आमहड्तालको आह्वान गरेका छन् । राष्ट्रपति निकोलस मदुरोलाई सत्ताबाट हटाउने प्रयासका लागि गुवाइदोले शृङ्खलाबद्ध आमहड्ताल आह्वान गरेका हुन् ।
राजधानी काराकासमा प्रदर्शनकारी र सुरक्षाकर्मीबीच झडप हुँदा एक महिलाको मृत्यु भएको छ । विपक्षी नेता गुवाइदोले सैन्य कू को प्रयास गरेको र त्यो असफल भएको राष्ट्रपति मदुरो पक्षले आरोप लगाएका थियो । तर, अमेरिकाले भने मदुरो भागेर क्युवा जाने तयारीमा रहेको भए पनि अन्तिम समयमा रुसको आग्रहमा नगएको दाबी गरेको छ ।
अमेरिकी दाबीलाई मदुरोले खण्डन गरेका छन् । गुवाइदो पक्षले भने मदुरोको ‘इनर सर्कल’ का तीन सदस्य उनलाई सत्ताबाट हटाउने पक्षमा सहमत भएको र पछि आफ्नो निर्णयमा अडिग रहन नसकेको दाबी गरेको थियो । अमेरिकी अधिकारीले गुवाइदोको पक्षमा उभिने बताएका मदुरोका तीन विश्वासपात्रले पछि बोली फेरेको बताएको अन्तर्रा्ष्ट्रिय सञ्चारमाध्यमहरुले जनाएका छन् ।
