एजेन्सी, बैशाख २०
मुम्बई इन्डियन्सले सनराइजर्स हैदरावादलाई सुपर ओभरमा हराउँदै जारी इन्डियन प्रिमियर लिग (आईपीएल)को प्ले अफमा पुगेको छ ।सुपर ओभरमा ९ रनको लक्ष्य मुम्बईले सुरुवाती तीन बलमा पुरा गर्यो । ओपनर हार्दिक पान्ड्याले पहिलो बलमै राशिद खानलाई छक्का प्रहार गरे । दोस्रो बलमा १ रन लिए र स्ट्राइक काइरन पोलार्डलाई दिए ।तेस्रो बलमा पोलार्डले दुई रन लिदै खेल जिताए ।
हैदरावादका सुपर ओभरमा मोहम्मद नाबी र मनिष पान्डे मैदान उत्रेका थिए । मुम्बईका जसप्रित बुमराहले पहिलो बलमा मनिष पान्डेलाई रन आउट गराए । दुई रन लिने क्रममा रन आउट हुन पुगे । दोस्रो बलमा १ रन लिदै मार्टिन गुप्टिलले स्ट्राइक मोहम्मद नाबीलाई दिए । नाबीले तेस्रो बलमा छक्का प्रहार गरे । चौथो बलमा भने बुमराहले नाबीलाई बोल्ड आउट गरेपछि मुम्बईले ९ रनको सामान्य लक्ष्य पाएको थियो ।
त्यस अघि १ सय ६३ रनको विजयी लक्ष्य पछ्याएको हैदरावादले २० ओभरमा ६ विकेटको क्षतिमा १ सय ६२ रन बनाएपछि खेल सुपर ओभरमा पुगेको हो । हैदरावादलाई जितको लागि अन्तिम ओभरमा १७ रन चाहिएको थियो । पहिलो र दोस्रो बलमा हार्दिक पान्ड्याले एक – एक रन दिए पनि तेस्रो बलमा मोहम्मद नाबीले छक्का प्रहार गरेपछि खेल थप रोचक अवस्थामा पुग्यो ।
लगतै अर्को बलमा भने ठूलो शट खेल्ने धुनमा नाबी सुर्य कुमार यादवबाट ३१ रनमा क्याच आउट भए । पाँचौ बलमा दुई र अन्तिम बलमा मनिष पान्डेले छक्का प्रहार गरेपछि खेल सुपर ओभरमा पुगेको हो । नाबीले २० बलमा समान २ चौका र छक्का प्रहार गरे ।
मनिष पान्डे ७१ रनमा अविजित रहे । उनले ४७ बलमा ८ चौका र २ छक्का प्रहार गरे । ओपनर रिद्धीमान शाह २५ र मार्टिन गुप्टिल १५ रनमा आउट भए । कप्तान केन विलियम्सन ३,विजय शंकर १२ र अभिषेक शर्मा २ रनमा आउट भए ।
मुम्बईका लागि जसप्रित बुमराह,कुनाल पान्ड्या र हार्दिक पान्ड्याले समान २ विकेट लिए । त्यस अघि घरेलु मैदान वानखडेमा टस जितेर पहिला ब्याटिङ थालेको मुम्बईले निर्धारित २० ओभरमा ५ विकेटको क्षतिमा १ सय ६२ रन बनायो । मुम्बईका लागि ओपनर क्विन्टन डी ककले अर्ध शतकीय अविजित महत्वपूर्ण इनिङ्स खेल्दै टोलीलाई सस्तैमा समेटिनबाट जोगाए । डी ककले ५८ बलमा ६ चौका र २ छक्का प्रहार गर्दै ६९ रनमा अविजित रहे ।
मुम्बईको सुरुवात मध्यम रह्यो । पहिलो विकेटका रुपमा छैटौं ओभरको दोस्रो बलमा खलिल अहमदले कप्तान रोहित शर्मालाई मोहम्मद नाबीबाट २४ रनमा क्याच आउट गराए । रोहितले १८ बलमा ५ चौका प्रहार गरे । सुर्य कुमार यादव २३,इभिन लुईस १,काइन पोलार्ड १० र हार्दिक पान्ड्या १८ रनमा क्याच आउट भए । कुनाल पान्ड्या ९ रनमा अविजित रहे ।
हैदरावादका लागि खलिल अहमदले ३ विकेट लिदा भुवनेश्वर कुमार र मोहम्मद नाबीको नाममा समान १ विकेट रह्यो । मुम्बई १३ खेलमा ८ मा जित र ५ मा हारका साथ १६ अंक जोड्दै दोस्रो स्थानमा उक्लिदै प्ले अफमा पुगेको हो ।
चेन्नई सुपर किंग्स १३ खेलमा ९ मा जित र ४ मा हारका साथ १८ अंक जोड्दै शीर्ष स्थानमा छ । दिल्ली १३ खेलमा ८ मा जित र ५ मा हारका साथ तेस्रो स्थानमा पुगेको छ । हैदरावाद १३ खेलमा ७ मा हार र ६ मा जितका साथ चौथो स्थानमा स्थानमा यथावत छ ।(हाम्रो खेलकुद)
