१२ असार, काठमाडौं ।
एसईई परीक्षाको नतिजा प्रकाशनको निर्णय गर्न बिहीबार(आज) दिउँसो बोर्ड बैठक बोलाइएको छ । बैठकको निर्णयपछि बिहीबारनै नतीजा प्रकाशित गर्ने तयारी गरिएको परीक्षा नियन्त्रण कार्यालयले जनाएको छ । सामान्यतया बोर्ड बैठकलगत्तै नतिजा सार्वजनिक गर्ने चलन छ ।
परीक्षा नियन्त्रक विष्णुप्रसाद अधिकारीले भने, ‘दिउँसो बोर्ड बैठक बोलाइएको छ । बैठकले निर्णय गरेपछि नतिजा सार्वजनिक हुन्छ ।’
अघिल्लो वर्षको तुलनामा यस पटक केही ढिला गरी नतिजा प्रकाशन हुन लागेको हो । प्रदेश २ मा प्रश्नपत्र बाहिरिएपछि पुनः परीक्षा लिनु परेको र कर्मचारी समायोजन हुँदा पनि जनशक्ति अभाव भएकाले नतिजा ढिला आउन लागेको हो ।
चैत १० गतेबाट संघीय संरचनाअनुसार पहिलो पटक भएको परीक्षामा देशभरबाट ४ लाख ७५ हजारभन्दा बढी परीक्षार्थी सहभागी भएका थिए ।
