२२ भदौ, विराटनगर । ५३ औ अन्तराष्ट्रिय साक्षरतादिवस र ४० औं राष्ट्रिय शिक्षादिवसको सन्दर्भ पारेर प्रदेश–१ सरकारले मोरङबाट डिजिटल लिट्रेसी अभियानको सुरुआत गरेको छ ।
मोरङको बुढीगंगा गाँउपालिका–१ टंकीसिनबारी स्थित श्री नरग्राम माध्यमिक विद्यालयमा डिजिटल लिट्रेसी शिक्षा आरम्भ गर्दै अभियान संचालनमा ल्याइएको हो । सो विद्यालयमा सामाजिक विकास मन्त्रालयले आयोजना गरेको कार्यक्रमका बीच मुख्यमन्त्री शेरधन राईले ल्यापटपमा क्लिक गर्दै डिजिटल लिट्रेसी शिक्षाको शुरुआत गरे ।
कार्यक्रमलाई सम्बोधन गर्दे मुख्यमन्त्री राईले प्रदेश १ बाट नेपालमै पहिलोपटक डिजिटल लिट्रेसी शिक्षा शुरु गरिएको बताए । उनले सूचना र प्रविधिलाई बिकास र समृद्धिसंग जोड्ने अभियानअन्र्तगत अभियान सुरु गरिएको बताए ।
प्रदेशभरिका विद्यालयहरुमा यो अभियान पु¥याइने उनले उल्लेख गरे । मुख्यमन्त्री राईले अमेरिकामा हुने पढाइको पाठ्यक्रममा आधारित पढाई अब डिजिटल लिट्रेसी लागू हुने विद्यालयहरुमा पढाइने बताए ।
सामाजिक विकास मन्त्री जिवन घिमिरेले आउदो १० बर्षभित्र विद्यालयहरुबाट स्कुल ब्याग विस्थापित गर्ने घोषणा अनुसार डिजिटल लिट्रेसी अभियान सुरु गरिएको बताए । उनले पहिलो चरणमा पाइलट प्रोजेक्टको रुपमा प्रदेश भित्रका १ सय विद्यालयमा यो अभियान चलाइने जानकारी दिए ।
उनले अभियानलाई सफल बनाउन अध्यापन गराउने शिक्षकका साथै आमा समूहलाई आईटी सम्बन्धि तालिक दिन थालिएको बताए । मन्त्री घिमिरेले प्रदेश एकलाई चाँडै नै साक्षर प्रदेश घोषणा गरिने जानकारी समेत गराए ।
डिजिटल लिट्रेसी अभियान सुरु गर्नुअघि नरग्राम माध्यमिक विद्यालयमा २० वटा कम्पयुटर जडान गरि ईल्याब स्थापना गरिएको छ ।
