सुनसरी, फागुन ११
ट्राफिक कारवाहीमा परेका मोटरसाईकलहरु धनीहरुले नै लिन नआए पछि जिल्ला ट्राफिक प्रहरी कार्यालय सुनसरीमा अलपत्र परेका छन । वर्षौ देखि अलपत्र परेका यी मोटरसाइकलहरु थोत्रा भैसकेका छन् ।
धरान स्थित जिल्ला ट्राफिक कार्यालयले जालीले घेरेर मोटरसाईकलहरु राखेको छ । विभिन्न कार्वाहीमा परेर छाडी गएका करिब ५ सय मोटरसाइकलहरु थन्किएका छन् । थन्किएका मोटरसाईलकको उचित व्यवस्थापन नहुँदा कारवाहीबाट उठ्नु पर्ने राजस्व पनि गुमाउनु परेको जिल्ला ट्राफिक प्रहरी कार्यालय सुनसरीका प्रमुख होमनाथ दाहालले बताए ।
ट्राफिक कार्यालयका अनुसार प्रत्येक वर्ष करिब ५ हजार मोटरसाईकलहरु कारवाहीमा पर्ने गरेका छन् भने वर्षेनी करिब ५० वटा मोटरसाईकलहरु कार्यालयमै अलपत्र हुने गरेका छन ।
