२५ असोज, काठमाडौं ।
चिनियाँ राष्ट्रपति सी जिनपिङको स्वागतको सम्पुर्ण तयारी पुरा भएको छ । सीको स्वागतका लागि काठमाडौंलाई चिटिक्क सजाइएको छ ।
राष्ट्रपति सी दुई दिने नेपाल भ्रमणका क्रममा शनिबार अपराह्न काठमाडौं आइपुग्नेछन् । उनलाई त्रिभुवन अन्तराष्ट्रिय विमानस्थलमा राष्ट्रपति विद्यादेवी भण्डारी, प्रधानमन्त्री केपी शर्मा ओलीलगायतले स्वागत गर्नेछन् ।त्यहाँबाट सी सोल्टी होटलमा जानेछन् ।
विमानस्थलबाट सी बस्ने सोल्टी होटलसम्म जाने सडक कालोपत्रे गरिएको छ, विद्युतको पोलपोलमा दुवै देशका राष्ट्रपतिको तस्वीरहरु टाँगिएको छ । सडकहरुमा स्वागतद्वारहरु बनाइएको छ भने सडकका मेडियन तथा पेटीहरुमा गमला राखिएको छ ।
