२७ असोज, काठमाडौं । १४ जना व्यक्तिको हत्या आरोपमा पक्राउ परेसँगै रौतहट(२ का नेपाली कांग्रेसका सांसद मोहम्मद अफताव आलमले सांसदको हैसियत गुमाएका छन् ।
बाह्र वर्षअघि पहिलो संविधान सभा चुनावका बेला आलमकै घर नजिक भएको बम विष्फोटमा परी दुई जनाको घटनास्थलमै मृत्यु भएको थियो ।
विष्फोटमा घाइते भएका ११ जनालाई इँटाभट्टाको भुङ्ग्रोमा हालेर हत्या गरेको आरोपमा पक्राउ परेसँगै उनले सांसदको हैसियतमा कुनै पनि अधिकार प्रयोग गर्न पाउने छैनन् । उक्त हत्याकाण्डबारे जाहेरी दिने शेख रूक्साना खातुनलाई गोली हानेर मारेको आरोप समेत उनलाई लागेको छ ।
त्यस्तै उनको तलब, सुविधा रोकिएको छ । प्रहरीले आलम पक्राउ परेको जानकारी संघीय संसद सचिवालयलाई उपलब्ध गराइसकेको छ । संघीय संसद सचिवालयका सञ्चार विज्ञ शेखर अधिकारीले आलम पक्राउको सूचना प्राप्त भएको बताए । प्र
तिनिधिसभा नियमावलीको दफा २ सय ४४ को उपदफा ३ मा फौजदारी अभियोगमा पक्राउ गरेको जानकारी प्राप्त भएमा थुनामा रहेको अवधिभर सांसदको हैसियतमा कुनै कार्य गर्न कुनै उन्मुक्ति वा अधिकार प्राप्त नहुने उल्लेख छ ।
नियमावलीले त्यस्ता सांसदको पारिश्रमिक र सेवा सुविधा स्थगित हुने व्यवस्था गरेको छ । आलम अदालतबाट दोषी ठहर भएमात्र उनी निलम्बनमा पर्नेछन् । साथै, अदालतले दोषी ठहर गरे उक्त पद रिक्त हुनेछ । दोषी ठहर नभएसम्म उनी सांसदको लोगो लगाएरै जेलमा रहनेछन् ।
