२ मंसिर, काठमाडौँ ।
अखिल नेपाल फुटबल संघ एन्फाले अपी शैपाल महिला गोल्डकप–२०७६ लाई स्वीकृति प्रदान गरेको छ ।
पुष २१ गतेदेखि कैलालीको धनगढी रंगशालामा आयोजना हुन लागेको सो प्रतियोगितालाई कैलाली जिल्ला फुटबल संघको सिफारिशमा स्वीकृति प्रदान गरिएको एन्फाले जनाएको छ ।
शैलेश्वरी स्पोर्टस क्लवको आयोजनामा हुने महिला गोल्डकप प्रतियोगिताले नेपाली महिला फुटबलको विकासमा ठूलो योगदान पुग्ने विश्वास पनि एन्फाले लिएको छ ।
प्रतियोगिताको खेल तालिका र प्रतियोगिता नियमावली प्रतियोगिता सञ्चालन हुनुभन्दा दुई हप्ता अगावै संघमा पठाई दिन पनि एन्फाले आग्रह गरेको छ ।
धनगढी रंगशालामा हुने प्रतियोगितामा तीन विभागिय र सात प्रदेशका गरी १० वटा टिमले सहभागिता जनाउने छन् । प्रथम हुनेले नगद् पाँच लाख एक हजारसहित ट्रफी तथा प्रमाणपत्र पाउने क्लवका अध्यक्ष धनश्याम भट्टले जानकारी दिए ।
उनका अनुसार प्रतियोगिताका विभिन्न विधाका उत्कृष्ट खेलाडीलाई जनही १० हजार पुरस्कार प्रदान गरिनेछ।
