पथरी, चैत ५
मोरङको पथरीशनिश्चरे नगरपालिकाले नगरपालिकाबाट निर्माण गरिने कानून, नीति, नियम निर्माण सहितका महत्वपूर्ण निर्णयहरु प्रकाशमा ल्याउन राजपत्र प्रकाशनका लागि कार्यविधि पारित गरेको छ ।
नगर प्रमुख दीलिपकुमार राईको अध्यक्षतामा आज बसेको नगर कार्यपालिकाको वैठकले विभिन्न १८ वटा वुँदामा छलफल गर्दै राजपत्र प्रकाशन सम्बन्धी कार्यविधि पारित गरेको हो ।
बैठकले दोस्रो नगरसभा आगामी वैशाख १७ गते वस्ने पनि टुंगो लगाएको छ । यसैगरी, चैत महिनाभरिमा आवश्यक परामर्श लिई शैक्षिक कार्यविधि पारित गर्ने तथा चाँडै वाल संरक्षण कार्यविधि निर्माण गर्ने पनि निर्णय भएको छ ।
अबको आर्थिक वर्षमा भूक्तानी गर्नेगरी वडाध्यक्षहरुका लागि आवश्यक मोटरसाइकल खरिद गर्न मोटरसाइकल कम्पनीसँग आशयपत्र माग गर्ने पनि निर्णय गरिएको छ ।
यस आर्थिक वर्षमा परेका योजनाहरु चैत मसान्तभित्र सम्झौता गरिसकेर जेठको १५ गतेसम्म सम्पन्न गरिसक्नु पर्ने वैठकले निर्णय गरेको छ । बैठकले सडक क्षेत्रका पसल र सामग्री हटाउनका लागि ७ दिनको समय दिइएको छ ।
