२० फागुन, विराटनगर ।
विश्व स्वास्थ्य संगठनले कोरोना भाइरसका कारण नेपाललाई उच्च जोखिम क्षेत्रमा राखेपछि नोभेल कोरोना भाइरस (कोभिड–१९) को संक्रमण फैलन नदिन स्वास्थ्य तथा जनसंख्या मन्त्रालयले सातवटै प्रदेशमा टोली परिचालन गरेको छ ।
प्रदेश १ मा स्वास्थ्य सेवा विभाग व्यवस्थापन महाशाखाका प्रमुख भोगेन्द्रराज डोटेलको नेतृत्वमा आएको टोलीले यहाँ कारोनाबारे सतर्कता अपनाउन तयारी थालेको छ । संघीय प्रतिनिधिमण्डलले प्रदेश राजधानी विराटनगरमा आएर सरकारी अस्पतालमा गरिएको तयारीबारे समेत जानकारी लिएको छ ।
सम्भावित संक्रमण र तयारीबारे टोलीले प्रदेश सरकारको सामाजिक विकास मन्त्री जीवन घिमिरे र मन्त्रालयका प्रतिनिधिसँग छलफल गरेको छ । मन्त्री घिमिरेले टोलीसमक्ष प्रदेश सरकारले सतर्कता अपनाउन सचेतनामुलक कार्यक्रममा समेत जोड दिएको बताए ।
प्रदेश १ का चीनसँग सिमाना जोडिएका संखुवासभा, ताप्लेजुङ र सोलुखुम्बु छन । ती जिल्लाका उत्तरी नाका भएर आवतजावत कम भए पनि ओलाङचुङ्गोला र किमाथाङ्का नाकाबाट भने चिनियाँ नागरिक प्रवेश हुने गरेका छन् । ती नाकामा कडाइ गरिएको छ ।
सामाजिक विकास मन्त्रालय स्वास्थ्य महाशाखाका प्रमुख डा. सुरेश मेहताले प्रदेशमा गरिएको तयारीबारे टोलीलाई जानकारी गराएको बताए । मेहताका अनुसार टोलीले नमुनाका रूपमा प्रदेश १ मा व्यक्तिगत सुरक्षाका सामग्री ५ थान र इन्फ्रारेड थर्मामिटर त्यति नै लिएर आएको छ ।
प्रदेश सरकारले यहाँका ६ वटा अस्पतालमा आइसोलेसन बेड छुट्याएको थियो । तर हाललाई कोसी अस्पताल र बीपी कोइराला स्वास्थ्य विज्ञान प्रतिष्ठान धरानमा केरोनाको उपचारको तयारी भएको मेहताले जानकारी दिएका छन् ।
कोसी अस्पतालमा १३ वटा बेडलाई सुरक्षित रूपमा आइसोलेसन वार्डका रूपमा राखिएको छ । बीपी कोइराला स्वास्थ्य विज्ञान प्रतिष्ठानमा आवश्यकता अनुसारको वार्ड तयारी अवस्थामा राखिएको छ ।
प्रदेश स्वास्थ्य निर्देशनालयले सूचना सम्प्रेषण, सीमाक्षेत्रमा जाँचमा कडाइ, आइसोलेसन वार्डको व्यवस्थापन, स्वास्थ्यकर्मीलाई तयारी अवस्थामा राखिएको र कडा खालको संक्रमण देखिएका बिरामीको निगरानीलगायतको तयारी गरेको प्रदेश स्वास्थ्य निर्देशनालयका निर्देशक चन्द्रदेव मेहताले बताएका छन् ।
टोलीले नेपाल–भारत सीमाको जोगबनी नाकाको पनि निरीक्षण गरेको छ ।
