२१ फागुन, काठमाडौं । प्रधानमन्त्री केपी शर्मा ओलीको अहिले त्रिवि शिक्षण अस्पतालमा मिर्गौला प्रत्यारोपण भइरहेको छ ।
अस्पतालका कार्यकारी निर्देशक प्रेम खड्काका अनुसार प्रधानमन्त्री ओलीलाई बिहान १० बजे शल्यक्रिया कक्षभित्र लगिएको हो । अबको केही घन्टापछि प्रधानमन्त्री ओलीको मिर्गौला प्रत्यारोपण सकिनेछ ।
ओलीले दोस्रो पटक मिर्गौला प्रत्यारोपण गरिरहेका छन् । आज राखिने नयाँ मिर्गौलापछि उनको शरिरमा चार वटा मिर्गौला हुनेछन्। तेह्र वर्षअघि उनले नयाँदिल्लीस्थित एपोलो अस्पतालमा पहिलो पटक मिर्गौला प्रत्यारोपण गरेका थिए। उनका आफ्ना दुई मिर्गौला र पहिलो पटक प्रत्यारोपण गरिएकोसहित तीन वटा मिर्गौला अहिले उनको शरिरमै छन् ।
नयाँ मिर्गौला पूरानो भएको ठाउँमा राखिन्न, पेटमा त्योभन्दा केही तल राखिन्छ । संसारभरि नै मिर्गौला प्रत्यारोपण गर्दा पूरानो झिक्ने प्रचलन छैन ।
पूरानो मिर्गौलामा संक्रमण भयो वा अरू केही खराबी भयो भनेमात्र त्यस्तो मिर्गौला निकाल्न फेरि सर्जरी गरिन्छ ।
त्रिवि शिक्षण अस्पतालमा दोस्रो पटक मिर्गौला प्रत्यारोपण गर्ने प्रधानमन्त्री ११ औं व्यक्ति हुन्। प्रधानमन्त्रीको मिर्गौला प्रत्यारोपणको नेतृत्व गरिरहेका मिर्गौला प्रत्यारोपण केन्द्रका प्रमुख प्राध्यापक डाक्टर प्रेमराज ज्ञवालीका अनुसार यसअघि १० जनामा दोस्रो पटक मिर्गौला प्रत्यारोपण सफल भइसकेको छ ।
उक्त अस्पतालमा पहिलो पटक गरिएको प्रत्यारोपणको सफलता पनि झन्डै ९९ प्रतिशत छ। अन्तर्रा्ष्ट्रिय मापदण्डअनुसार मिर्गौला प्रत्यारोपण गरिसकेपछि त्यो मिर्गौलाले एक वर्षसम्म काम गर्ने तथ्यांक ९५ देखि ९७ प्रतिशत भयो भने त्यसलाई मिर्गौला प्रत्यारोपणको सफलताको आँकडा मानिन्छ। त्रिवि शिक्षण अस्पतालको तथ्यांक हेर्ने हो भने ९८ दशमलव ७ प्रतिशत रहेको छ ।
