२३ चैत, काठमाडौँ । भारतको राजधानी नयाँ दिल्लीको निजामुद्दिन मस्जिदमा भएको धार्मिक सभामा सहभागी २५ जना नेपालीलाई पहिचान गरी क्वारेन्टाइनमा राखिएको छ ।
सभामा सहभागी भएका केही व्यक्तिमा कोरोना भाइरसको संक्रमण पुष्टि भएको र केहीको मृत्यु भएको समाचारपछि त्यसमा नेपाली पनि सहभागी भएको सूचना भारत सरकारले नेपाललाई दिएको थियो ।
आधिकारिक स्रोतबाट प्राप्त समाचार अनुसार प्रदेश २ का चार जिल्लाबाट २५ जना नेपाली सहभागी भएका थिए । उनीहरु सबैलाई सेनाद्वारा निगरानी गरिएको क्वारेन्टाइनमा राखिएको छ ।
स्रोतले आइतबार नै उनीहरुको थ्रोट स्वाब परीक्षणका लागि पठाएको र त्यसको रिपोर्ट अनुसार अगाडिको उपचार हुने बताएको छ ।
