१२ बैशाख, भैरहवा ।
नेपालमा लकडाउन भएपछि भारतका विभिन्न स्थानबाट सीमामा आएर भारतीय क्वारेन्टाइनमा बसेका झन्डै एक सयजना नेपाली आज देश प्रवेश गरेका छन् ।
केन्द्र सरकारले सीमाको क्वारेन्टाइनमा बसेकाबारे निर्णय गर्ने अधिकार स्थानीय सरकारलाई दिएपछि उनीहरुलाई ल्याउने निर्णय गरिएको हो ।
२५ दिन पहिले सीमामा आएका उनीहरुलाई भारतको नौतनवामा क्वारेन्टाइनमा राखिएको थियो। नौतनवा क्वारेन्टाइनमा ३ सय २४ जना नेपाली बस्दै आएका थिए। शनिबारदेखि बाँकी रहेकालाई पनि ल्याइने रुपन्देहीका प्रमुख जिल्ला अधिकारी महादेव पन्थले बताए।
नेपाल भित्रिएकाको सीमामा नै आरडिटी टेस्ट गरिने र नेगेटिभ आउनेलाई आफ्नै जिल्ला गएर १४ दिन क्वारेन्टाइन बस्नेगरी पठाइने पन्थले बताए ।उनले पोजेटिभ रिपोर्ट आएकालाई बुटवलको कोरोना अस्पतालको आइसोलेसनमा राख्ने व्यवस्था मिलाएको बताए ।
