२८ वैशाख, काठमाडौं ।
काठमाडौंको चन्द्रागिरी नगरपालिका वडा नम्बर १५ ले राहतको सट्टा रोजगारी दिने भएको छ।
वडाभित्र स्थायी–अस्थायी रूपमा बसोबास गर्ने दैनिक ज्यालामजदुरी गरी खाने नागरिकलाई वडाले काम दिने बताएको हो। कोरोनाभाइरस महामारीका कारण देश लकडाउनमा रहेको र यस्तो बेला कामविहीन उनीहरूलाई नगरपालिकाले खाद्यान्नलगायत राहत दिँदै आएको थियो।
अब राहतको सट्टामा नगरपालिकाले काम दिन लागेको हो। वडाध्यक्ष उत्तमबहादुर राउतले सूचना निकालेर भीडभाड गरी राहत बाँड्ने र खाना खुवाउँदा झन् कोरोना संक्रमण फैलन सक्ने डर रहेको भन्दै उनले बरू वडाले कामको व्यवस्था मिलाएको उल्लेख गरेका छन्।
‘लकडाउनका बेला आयआर्जन नहुँदा हातमुख जोर्ने समस्या सिर्जना भएको छ, उहाँहरूलाई भीडभाड गरी राहत बाँड्ने, खाना खुवाउने गर्दा झन् संक्रमणको जोखिम बढ्ने संभावना भएकोले स्वाभिमान पनि उठ्ने गरी वडा कार्यालयले समस्याग्रस्त परिवारको एक सदस्यलाई कामको प्रवन्ध गरेको हुँदा वडा कार्यालयमा सम्पर्क गर्नु हुन अनुरोध गरिन्छ,’ वडाध्यक्ष राउतले निकालेको सूचनामा भनिएको छ।
