२ जेष्ठ, एजेन्सी । बंगलादेशस्थित विश्वकै सबैभन्दा ठूलो शरणार्थी शिविरमा पनि दुई जनामा कोरोना भाइरसको संक्रमण पुष्टि भएको छ ।
बंगलादेशको कक्स बजारमा रहेको रोहिंग्या शिविरमा बस्ने दुई रोहिंग्यामा संक्रमण पुष्टि भएपछि चिन्ता र त्रास थपिएको छ । उक्त शिविरमा म्यानमारमा भएको हिंसाबाट जोगिनका लागि भागेर आएका करिब १० लाख रोहिंग्या बस्दै आएका छन् ।
संक्रमण पुष्टि भएका दुई रोहिंग्यालाई आइसोलेशनमा राखेर उपचार थालिएको बिबिसीले जनाएको छ । शिविरका करिब १९ सय शरणार्थीलाई आइसोलेशनमा राखिएको छ भने उनीहरुमा कोरोना भाइरसको संक्रमण रहे नरहेको थाहा पाउन परीक्षण हुँदैछ ।
रोहिंग्या शिविर मार्च १४ देखि लकडाउनमा छ । शिविरमा कोरोना भाइरसको संक्रमण फैलिएमा भयावह हुनसक्नेमा चिन्ता बढेको छ । कक्स बजारस्थित शिविरका साँघुरा टहरामा स्वच्छ पानीको पहुँच समेत नभएको बताइएको छ ।
बंगलादेशस्थित सेभ द चिल्ड्रेनका स्वास्थ्य निर्देशक डा. शमिम जाहनले विश्वको सबैभन्दा ठूलो शरणार्थी बस्तीमा भाइरसको प्रवेश गरेकाले यसबाट हजारौँ व्यक्तिको ज्यान जोखिम रहेको बताए ।
शिविरमा प्रति वर्ग्किलोमिटरमा ४० हजारदेखि ७० हजार शरणार्थी बस्ने भएकाले सामाजिक दूरी कायम गर्नसमेत गाह्रो हुने र संक्रमण समुदायस्तरमा फैलन सक्ने चेतावनी दिइएको छ ।
