२ जेठ, काठमाडौँ ।
भारतका प्रधानसेनापति मनोज मुकुन्द नरवानेले लिपुलेखमा मानसरोवर जाने भारतले निमार्ण गरेको सडकबारे नेपालले अरू कसैको निर्देशनमा आपत्ति जनाएको आरोप लगाएका छन् । नरभानेले शुक्रबार नेपालले आफ्नो भूभाग महाकाली नदीको पूर्वतर्फ भएको बताउँदै आएको र भारतले अहिले निर्माण गरेको सडक नदीको पश्चिमतर्फ रहेको दाबी गरेका छन् ।
नेपाली पक्षले आपत्ति जनाउनु पर्ने कुनै कारण नभएको दाबी गर्दै नेपालले अरु कसैको ईसारामा विरोध गरेको उनले जिकिर गरेका हुन्। उनले भारतले लिपुलेकमा मानसरोवर जानको लागि खनेको बाटो भारतीय भूमिमा नै खनेको दाबीसमेत गरेका छन् ।
भारतका रक्षा मन्त्री राजनाथ सिंहले गतसाता धार्चुलाबाट मानसरोवर जोड्ने सडकको उद्घाटन गरेका थिए ।नेपाली भूमिमा भारतले एक पक्षीय रूपमा सडक बनाएको भन्दै नेपालले कडा आपत्ति जनाएको छ। परराष्ट्र मन्त्रालयले काठमाडौंस्थित भारतीय राजदूत विनयमोहन क्वात्रालाई बोलाई कूटनीतिक नोट दिएको थियो। भारतीय कदमको विरोधमा जनस्तरमा पनि प्रदर्शन हुँदै आएका छन्।
यसबारेमा छलफल गर्न प्रधानमन्त्री केपी शर्मा ओलीले सर्वदलीय बैठक डाकेका छन्। नेपालका सबै दलले भारतले कालापानी क्षेत्रमा नेपाली भूमि अतिक्रमण गरेको भन्दै त्यसलाई फिर्ता ल्याउन कूटनीतिक पहल थाल्नुपर्ने सुझाव दिएका छन्।
