योगेन्द्र योगी
१३ जेठ, दोहा ।
गैर आवासिय नेपाली संघ राष्ट्रिय समन्वय परिषद कतार द्वारा गठित उद्दार तथा राहतबितरण समितीद्वारा कतार सरकार गृह मन्त्रालयमार्फत कतार च्यारिटीबाट प्राप्त खाद्यान्न वितरण कार्यलाई तिब्रता दिएको छ ।
नवौँ चरणमा कतारका विभिन्न स्ट्रीटमा रहेका २ सय जना कोरोना भाइरस पीडित नेपाली श्रमिकहरुलाई १५ दिनसम्म पुग्ने खाद्यान्न वितरण गरिएको गैर आवासीय नेपाली संघ कतारका प्रथम उपाध्यक्ष एबम उद्दार तथा राहत समितिका संयोजक उत्तम गुरुङले जानकारी दिए ।
कोरोनाको कारण पिडित नेपाली कामदारहरु धेरै भएपनि अहिलेसम्म १५ सय १५ जना नेपाली श्रमिकहरुलाई राहत स्वरुप खाद्यान्न वितरण गरिसकिएको तथा बाँकी पिडितहरुको नामावली संकलन कार्य भैरहेको संयोजक गुरुङ्गले बताए । कोरोना संकटको कारणले कतारमा रहेका नेपाली दाजुभाई तथा दिदीबहिनीहरूलाई खाना सम्बन्धी कुनै समस्या भए एनआरएनएकतारले उपलब्ध गराएको टेलिफोन नम्बर र ईमेल मार्फद पनि सम्पर्क गर्न अनुरोध गरिएको गैर आवासिय नेपाली संघ कतारका महासचिव पदम गिरीले बताए ।
कतारमा कोरोना संक्रमितको संख्या ४५ हजार नाघेको छ । सोमबार १ हजार ७ सय ५१ नयाँ थपिएसँगै संक्रमितको संख्या ४५ हजार ४ सय ६५ पुगेको छ । सोमबार मात्रै १ हजार १ सय ९३ जनाले उपचारपछि स्वास्थयलाभ गरेका छन् । योसँगै कतारमा उपचारपछि निको हुनेको संख्या १० हजार ३ सय ६३ पुगेको छ भने हालसम्म २६ जनाको मृत्यु भैसकेको कतारको स्वास्थय मन्त्रालयले जनाएको छ ।
