२ असार, धनगढी ।
भारतसँग १ सय १ किलोमिटर खुला सीमाना रहेको कैलालीमा सशस्त्र प्रहरीले ९ वटा बोर्डर आउट पोष्ट (बीओपी) स्थापना गरेको छ ।
सीमा सुरक्षाकै लागि स्थापित एउटा गुल्मसमेत गरी अहिले करिब सात सय जना जनशक्ति खटिएको सशस्त्र प्रहरीले जनाएको छ । कोरोना भाइरस संक्रमणको जोखिमसँगै भारतीय क्षेत्रबाट लुकीछिपी हुनसक्ने ओहोरदोहोरलाई नियन्त्रण गर्न सशस्त्र प्रहरीले सीमामा सुरक्षा केन्द्रित गरेको थियो ।
त्यसका लागि ७२ ठाउँमा अस्थायी पोष्ट स्थापना गरेर भारतसँग सीमा जोडिएको क्षेत्रलाई सिल गरेको थियो । यसअघि टीकापुर, भजनी र फुलबारीमा मात्रै बिओपी थिए । सरकारले ०७६ मंसिरमा देशभरमा एक सय १४ वटा बीओपी थप्ने निर्णय गर्दै कैलालीमा ६ वटा बीओपी स्वीकृत गरेको थियो ।
त्यसअनुसार कैलारी गाउँपालिकाको भुइँयाफाँटा, धनगढी उपमहानगरपालिका ९ बंगराकटान, धनगढी १० जुगेडा, कैलारी गाउँपालिका ३ खोनपुर र भजनी नगरपालिका ७ हिम्मतपुर र टीकापुरको श्रीलंका टापुमा बीओपी स्थापना गरिएका हुन् ।
‘छैटौं बीओपी गत शुक्रबार टीकापुर नगरपालिकाको श्रीलंका टापुमा स्थापना गरेका छौं,’ ३४ नम्बर गणका गणपति एसपी कमल तिमल्सिनाले भने, ‘अहिले विगतको तुलनामा सीमा सुरक्षाको अवस्था मजबुत भएको छ ।’
उनका अनुसार यसअघि एउटा बीओपीले ३० किलोमिटर क्षेत्र हेर्नुपर्ने अवस्था रहेकोमा अब एउटा बीओपीले पाँच किलोमिटर क्षेत्र वरिपरि हेर्न सकिने अवस्था रहेको उनले बताए । हरेक बीओपीमा इन्सपेक्टर खटाइएको छ भने गुल्मको नेतृत्व डीएसपीलाई दिइएको छ ।
बीओपी स्थापनाका लागि सबै प्रबन्ध धनगढीस्थित गणले नै मिलाएको बताएको छ । ‘ऐलानी जग्गा खोज्यौं, टीकापुर, भजनी, कैलारी र धनगढी नगरपालिकाले ५–५ लाख रुपैयाँ सहयोग गरेका छन्,’ गणपति तिमल्सिनाले भने, ‘हाम्रै जवानहरुलाई खटाएर बस्न लायक छाप्रोहरु निर्माण गर्न सफल भएका छौं ।’
पाँचवटा बीओपीको अस्थायी पूर्वाधार निर्माण गर्न प्रदेश सरकारले २५ लाख दिएकाले सजिलो भएको गणपति तिमल्सिनाले बताए । उनले जग्गा नाममा भइसकेपछि संघीय सरकारबाट आवश्यक पूर्वाधार निर्माणका लागि रकम आउने उनले बताए ।
