४ असार,नेपालगञ्ज ।
नेपालगञ्ज मेडिकल कलेजको कोहलपुर अस्पतालमा उपचारका क्रममा मृत्यु भएकी कैलालीकी एक महिलामा पनि कोरोना सङ्क्रमण पुष्टि भएको छ ।
मङ्गलबार राति मृत्यु भएकी कैलाली लम्की नगरपालिका –२ की ४३ वर्षीया महिलामा बुधबार कोरोना सङ्क्रमण पुष्टि भएको हो । नेपालगञ्ज मेडिकल कलेजका सहनिर्देशक डा. नितेश कनोडियाका अनुसार महिलाको टाउकोमा चोट लागेर रगत जमेकोमा उनलाई जेठ ३१ गते आइतबार अस्पतालमा ल्याएर भर्ना गरिएको थियो ।
उपचार शुरु गरेर जेठ २ गते दिउँसो उनको स्वाब सङ्कलन गरी भेरी अस्पताल नेपालगञ्जमा परीक्षणका लागि लगिएकोमा बुधबार बेलुकी आएको रिपोर्टमा कोरोना सङ्क्रमण पुष्टि भएको सहनिर्देशक कनोडियाले बताए ।
सहनिर्देशक कनोडियाका अनुसार ती महिलाको आइसियुमा राखेर उपचार भइरहेको थियो । योसँगै दुई दिनको अवधिमा मेडिकल कलेजमा मृत्यु भएका दुई महिलामा कोरोना पुष्टि भएको छ ।
यसअघि सोमबार मृत्यु भएकी बाँकेको बैजनाथकी एक महिलामा पनि कोरोना पुष्टि भएको थियो । कैलाली लम्कीकी महिलाको शव अहिले मेडिकल कलेजको शव गृहमा राखिएको छ । शव व्यवस्थापनका लागि सरोकारवालासँग छलफल भइरहेको अस्पतालले जनाएको छ ।
