२८ असार, एजेन्सी । जर्मन चान्सलर एञ्जेला मर्केलले झूठो बोलेर महामारीमाथि जीत सम्भव नहुने विश्व नेताहरुलाई प्रष्ट सन्देश दिएकी छन् ।
विश्व कोरोना महामारीको चपेटमा पर्दा विश्वका शक्तिसम्पन्न मुलुकका नेताहरुले लिएका कदमप्रति अनेकन आशंका भइरहँदा कोभिड १९ माथि सफलतापूर्वक विजय पाएको जर्मनीकी नेता मर्केलले झूठो नबोल्न सन्देश दिएकी हुन् ।
मर्केलले कसैको नाम त लिनुभएन तर अमेरिका, ब्राजिल, रुस जस्ता कोरोना महामारीलाई व्यवस्थापन गर्न विफल देखिएका नेताहरुतर्फ संकेत गर्दै भनिन्, ‘तपाईं झूठो बोलेर वा गलत सूचना बाँडेर महामारीमाथि विजय पाउन सक्नुहुन्न । यस्तै तपाई यसविरुद्ध घृणा गरेर पनि लड्न सक्नु हुन्छ तर त्यसले झन् विकृत रुप धारणा गर्नेछ । लोकप्रियताका लागि यथार्थ सच्चाईलाई नकार्न सकिन्न ।’
अमेरिकी राष्ट्रपति डोनल्ड ट्रम्प, ब्राजिलियन राष्ट्रपति जेयर बोल्सोनारो र रूसी राष्ट्रपति भ्लादिमीर पुटिनको कानै घोच्ने गरी निकै सशक्त तर शान्त, सतर्क, आत्मसंयम र तथ्यपूर्ण रुपमा मर्केलले नेताहरुको ध्यानाकर्षण गराएकी हुन् ।
कुनैबेला तत्कालीन अमेरिकी राष्ट्रपति बराक ओबामाले मर्केललाई उदार अन्तर्राष्ट्रीय व्यवस्थाको नेतृत्व गर्नुपर्ने आवश्यकता नै औल्याएका थिए ।
ट्रम्पबाट विश्वको नेतृत्व सम्भव नदेख्ने एवं वर्तमानमा कोरोना जस्तो महामारीलाई सम्बोधन गर्न असफल नेताहरुका बीचमा मर्केलले कसरी जनतालाई विश्वासमा लिएर जर्मनीलाई बाहिर निकाले भन्ने विषय अहिले निकै चर्चामा छ ।
