योगेन्द्र योगी
१ साउन, दोहा ।
कतारमा टिकट काट्न नसकेका नेपालीलाई टिकट उपलब्ध गराइने भएको छ । कतारस्थित नेपाली दूतावास, गैरआवासीय नेपाली संघ, (एनआरएनए) कतारले र नेपाली व्यवसायी संघ कतारले टिकट काट्न नसक्ने ५५ जना नेपालीलाई स्वदेश फिर्तीको लागि टिकटको व्यवस्था गर्ने भएका हुन् ।
एनआरएनए कतारबाट २० वटा, नेपाली व्यवसायी संघबाट २० वटा र नेपाली दूतावासबाट १५ वटा गरी ५५ वटा टिकट उपलब्ध गराउन लागिएको एनआरएनए कतारका प्रवक्ता सन्तोष क्षेत्री जानकारी दिएका छन् ।
प्रवक्ता क्षेत्रीका अनुसार लामो समयदेखि अस्पतालमा बसेका, कोरोना भाइरसको महामारीबाट रोजगारी गुमाएर पैसाकै कारण स्वदेश फर्किन नसकेका तथा गम्भिर स्वास्थ्य समस्या भएकाहरुलाई पहिलो चरणमा स्वदेश फर्काउनको लागि टिकट उपलब्ध गराइने छ ।
कतारमा रहेका स्थापित विभिन्न संघसस्थाहरुलाई पिडित नेपालीहरुको विवरण इमेल मार्फत पठाउन अनुरोध गरिएको एनआरएनए कतारका अध्यक्ष मोहम्मद मुक्त्तदाले बताए ।
यसअघि कतारबाट कोरोना कारण लगायत विभिन्न कारणले स्वदेश फर्किन नसकेका नेपाली नागरिकहरू मध्ये २ हजार ४ सय ६ जना नेपाली नागरिकहरू स्वदेश फर्किएका छन् । अब दोश्रो चरणको उडान यही जुलाई १७ मा नेपाल र हिमालय एयरलाइन्सले उडान गर्ने तय भएको छ ।
यस्तै जुलाई १८ र २० मा पनि हिमालय एयरलाइन्सले दुई र नेपाल एयरलाइन्सले दुई वटा उडान गर्ने छ भने कतारबाट दोश्रो चरणमा ६ जहाजले उडान गर्ने दूतावासका द्वितीय सचीव प्रबीण भट्टराईले जानकारी दिएका छन् । कतार लगायत खाडीका अन्य देशहरुमा टिकट काट्न नसकेकै कारण धेरै नेपालीहरु समस्या रहेका छन् ।
