७ साउन, लमजुङ । लमजुङमा पहिरो खस्दा जिल्लाको मर्स्याङ्दी गाउँपालिका–३, तरापु पल्लोटारी गाउँका १८ वटा घरहरु पुरिएका छन् । जम्मा ७४ घर रहेको गाँउका सबै घरमा पहिरोले क्षति पु¥याएको स्थानीयहरुले बताएका छन् ।
केही दिनदेखिको अविरल वर्षाका कारण बुधबार बिहान १० बजेतिर पहिरो खस्दा गाउँलेको घर पुरिएको स्थानीयहरु बताउँछन् । उनका अनुसार मंगलबार पहिरो गएपछि २१ घरपरिवार नजिकैको स्कुलमा बस्न गएका थिए ।
मंगलबार पहिरो गएको ठाउँबाट पुन पहिरो गएकाले घरहरु पुरिएको तर, गाउँलेहरु भने मंगलबार नै स्कुलमा सरेकाले मानवीय क्षति नभएको मर्स्याङ्दी गाउँपालिका वडा नम्बर ३ का अध्यक्ष प्रेमबहादुर बस्नेतले बताए । उनका अनुसार पहिरो खस्दै गर्दा भाग्ने क्रममा ४ जना घाइते भएका छन् । पहिरोले पुरिएका घरका सामान झिक्ने क्रममा माथिबाट पहिरो झर्न थालेपछि भाग्ने क्रममा स्थानीय घाइते भएका थिए ।
उद्धारकार्यमा खटिएका पल्लोगाउँ सेग्लेका गुमानसिंह भण्डारीका अनुसार पहिरोले घरहरु पुरिँदा घरभित्रका सामानहरु निकाल्न पाइएको छैन । स्थानीय साथै वरपरका बासिन्दा उद्धार कार्यमा संलग्न रहेको उनले बताए ।
गाउँपालिका अध्यक्ष अर्जुन गुरुङले पहिरो गएको जानकारी पाउनेबित्तिकै घटनास्थल पुगेर घाइतेको उद्धार गरी उपचारका लागि पठाइएको बताए ।
मंगलबार केही घरमा क्षति पु¥याएकोमा बुधबारको पहिरोले सिंगो गाउँमा क्षति पु¥याएको लमजुङका डीएसपी गंगाबहादुर थापाले बताए । घटनास्थलमै रहेका उनले सबैजना उद्धार कार्यमा जुटिरहेकाले क्षतिको विवरण अझै आइनसकेको बताए ।
