८ साउन, झापा ।
सम्बन्धित निकायको लापरबाहीले झापाको भद्रपुरमा तीन जना बालकको पानीमा डुबेर मृत्यु भएको छ । तीन जना बालकको मृत्यु भएसँगै भद्रपुरका २ नम्बर वडावासी शोकमा डुबेका छन् ।
भद्रपुर नगरपालिका–२ पृथ्वीनगर स्थित कमलधाप पर्यटन तथा सिमसार क्षेत्र निर्माण स्थलमा खनिएको पोखरीमा डुबेर तीन जना बालकको मृत्यु भएको जिल्ला प्रहरी कार्यालय झापाका डिएसपी राकेश थापाले जानकारी दिए । मृत्यु हुनेमा भद्रपुर–२ डिगाउँ बस्ने अनिल तामाङको १० वर्षका छोरा अङ्कुश तामाङ, भद्रपुर–२ बस्ने कमला थामीका दुई छोरा अन्दाजी १४ र १२ वर्षका करण र अर्जुन थामी रहेको डिएसपी थापाले बताए ।
प्रहरीका अनुसार दिउँसो कमलधाप पर्यटन तथा सिमसार क्षेत्र निर्माण स्थलमा खनिएको पोखरीमा माछा मार्न तीनै जना बालक गएका थिए । घरमा कसैलाई नभनी गएका तीन जना बालक साँझ अबेर सम्म घर नफर्किएपछि उनीहरूको आफन्तजनले खोजी गरेका थिए ।
खोजी गर्ने क्रममा बालक तामाङको शव पोखरीमा डुबेको अवस्था फेला परेको थियो । तीन जना बालकको खनिएको पोखरीमा डुबेर मृत्यु भएपछि आफन्त र स्थानीयबासी आक्रोसित बनेका छन् । उनीहरुले पिडीत परिवारलाई उचित न्यायसँगै राहतको माग राख्दै घटनास्थलबाट दाजुभाइको शव उठाउन दिएका छैनन ।
