१२ साउन, काठमाडौँ ।
राष्ट्रिय खेलकुद परिषद् (राखेप)को सदस्य सचिवमा पुनः रमेश सिलवाल नियुक्त भएका छन् । सोमबार बसेको मन्त्रिपरिषद् बैठकले सिफारिसमा परेका तीन जना मध्येबाट सिलवाललाई चार वर्षका लागि नियुक्त गरेको हो ।
हालै लागू भएको राष्ट्रिय खेलकुद विकास ऐन–२०७७ का कारण १ वर्षमै पदमुक्त भएका सिलवाल नयाँ ऐनमा व्यवस्था भएअनुसारको प्रक्रिया पूरा गरी पुनः नियुक्त भएका हुन् ।
संघीयता अनुकूल हुने गरी ल्याइएको खेलकुद ऐनको पहिलो कार्यान्वयनका रुपमा सदस्यसचिवको छनोट प्रक्रिया प्रतिस्पर्धात्मक विधिबाट गरिएको हो ।
खेलकुद मन्त्रालयका सचिव रामप्रसाद थपलियाको संयोजकत्वमा मन्त्री जगतबहादुर विश्वकर्माले नियुक्त गरेका खेल विज्ञद्वय रिम रानाभाट र इन्दिरा निरौला सम्मिलित समितिले २५ प्रतिस्पर्धी मध्येबाट सिलवालसहित भलिवलकी पूर्वकप्तान अन्जु श्रेष्ठ र भलिवल संघका पूर्व उपाध्यक्ष तथा नेकपा केन्द्रीय सदस्य लिलबहादुर थापामगरको नाम मन्त्रालयमा सिफारिस गरेको थियो । मन्त्रालयले मन्त्रिपरिषद् पेश गरेअनुसार सोमबार नियुक्ति गरिएको हो ।
याँ ऐनले सदस्यसचिवका लागि ३० वर्ष पूरा भएको ६० वर्ष ननाघेको, कम्तिमा ५ वर्ष खेलकुदमा बिताएका र कम्तिमा स्नातक तह उत्तीर्ण गरेको हुनुपर्ने मापदण्ड तोकेको छ ।
शिक्षा व्यवसायी तथा लामो समयदेखि क्रिकेटमा सक्रिय सिलवालले गत वर्षको असार २३ गते राखेपको १८ औं सदस्यसचिवका रुपमा कार्यभार सम्हालेका थिए । नयाँ ऐनमा पुरानो नियुक्तिले वैधता नपाएपछि १ वर्ष नपुग्दै पदमुक्त भएका उनलाई १३औं दक्षिण एसियाली खेलकुदको सफल आयोजनाका लागि जस दिने गरिन्छ ।
