२३ साउन, एजेन्सी । स्पेनिस क्लब सेभिल्ला युरोपा लिगको क्वाटरफाइनलमा प्रवेश गरेको छ । जर्मनीमा बिहीबार राति भएको खेलमा इटालियन क्लब रोमालाई पराजित गर्दै सेभिल्लाले २–० ले हराउँदै अन्तिम आठको यात्रा तय गरेको हो ।
सेभिल्लाको जितमा सर्जियो रिगुइलन र युस्सेफ इन न्यास्रीले गोल गरे । दुवै गोल पहिलो हाफमा सम्भव भएको थियो । खेलको शुरुवातदेखि नै सेभिल्लाले रोमालाई दवावमा राख्दै गोल गर्न सफल भएको थियो ।
इन्ज्युरी समयमा इभर बनेगाको प्रहार बारमा लागेर फर्कदा सेभिल्ला अर्काे गोलबाट चुक्यो । अन्तिम समयमा रोमा १० खेलाडीमा समेटियो । लुक डि जङलाई फल गरेपछि रेफ्रीले भिएआरको सहायता लिदै जियानलुका मान्सिनीलाई रातो कार्ड देखाउदै मैदान बाहिर पठाएका थिए ।
अब सेभिल्लाले क्वाटरफाइनलमा इंग्लिस क्लब वल्भ्सको सामना गर्नेछ । वल्भ्सले बिहीबार राति नै भएको खेलमा ग्रीसको ओलम्पियाकोसलाई १–० ले तथा समग्रमा २–१ ले पराजित गर्दै क्वाटरफाइनलमा स्थान पक्का गरेको थियो ।
वल्भ्सको जितमा राउल जिमिनेजले खेलको नवौं मिनेटमा पेनाल्टीमार्फत गरेको गोल नै निर्णायक बन्यो । गोलरक्षक बोबी एलियनको गल्तीमा वल्भ्सले पेनाल्टी पाएको थियो । जसलाई जिमिनेजले सदुपयोग गरे । २८औं मिनेटमा ओलम्पियाकोसका मोहमेद माडी कामराले गोल गरेपनि उनी भिएआरमा अफसाइड ठहरिए ।
