२३ साउन, रुकुम पश्चिम ।
सरकारी रकम व्यक्तिगत खातामा जम्मा गर्ने त्रिवेणी गाउँपालिकाका लेखापालसहित चार जना कार्यालयबाटै पक्राउ परेका छन् ।
कारबाहीबाट बच्न बिहीबार राती कार्यालयमा गई कागजात मिलाउँदै गरेको अवस्थामा लेखापाल हेमन्त केसी, लेखा सहयोगीसमेत रहेका उनका भतिजा सुवास केसी, भाइ विकास र अर्का भतिजा भीमसेन केसीलाई राति ९ बजे कार्यालयबाटै प्रहरीले नियन्त्रणमा लिएको हो ।
बाहिरबाट ताला लगाई भित्र कागजात मिलाउँदै गरेको थाहा पाएपछि स्थानीयले प्रहरीलाई खबर गरेका थिए । पक्राउ परेका चारै जनालाई जिल्ला प्रहरी कार्यालय र्पुयाइएको छ ।
आर्थिक वर्ष २०७६÷०७७ को २४ लाख ९२ हजार ३ सय ७२ रुपैयाँ लेखापाल हेमन्त, उनकी पत्नी बिर्मा र लेखा सहयोगी सुवासले अनधिकृत रूपमा आफ्नै खातामा राखेका थिए । विना कुनै प्रयोजन व्यक्तिका खातामा सरकारी रकम जम्मा भएको थाहा पाएपछि कार्यपालिकाले चासो व्यक्त गरेको थियो ।
पछि उनीहरूले रकम गाउँपालिकाकै खातामा जम्मा गरेका थिए । यस विषयमा जिल्ला प्रशासनले कार्यालयले छानबिनसमेत थालेको थियो । उनीहरुमाथि अनुसन्धान थालिएको प्रहरीले जनाएको छ ।
