२९ साउन, एजेन्सी ।
भारतमा कोरोनाभाइरस संक्रमितको संख्या लगातार बढिरहेको छ।
बुधबार एकैदिन अहिलेसम्मकै बढी ६७ हजारभन्दा धेरै संक्रमित भेटिएका छन्। भारतमा अब संक्रमितको संख्या करीब २४ लाख पुगेको छ। तीमध्ये करीब १७ लाख निको भएका छन्। त्यहाँ सक्रिय संक्रमित ६ लाख ४४ हजार ११६ छन्। भारतमा बुधबार एकैदिन अहिलेसम्मकै सबैभन्दा धेरै संक्रमित निको पनि भएका छन्।
हिजो मात्र ५७ हजार ७५९ बिरामी निको भएर घर फर्किएका छन्। यसअघि ११ अगष्टमा एकैदिन ५६ हजार ४६१ संक्रमित निको भएका थिए। अहिलेसम्म भारतमा ४७ हजार १३८ संक्रमितको मृत्यु भएको छ। बुधबार मात्र ९५० संक्रमितले ज्यान गुमाए। पछिल्लो २४ घन्टामा २३ राज्यमा संक्रमितको मृत्यु भएको छ।
सबैभन्दा बढी संक्रमित महाराष्ट्रमा छन्। त्यहाँ अहिलेसम्म पाँच लाख ४८ हजार ३१३ संक्रमित फेला परेका छन्। बुधबार मात्र १२ हजार ७१२ संक्रमित फेला परेका छन्।
