२९ साउन, एजेन्सी । भारतका पूर्वराष्ट्रपति प्रणव मुखर्जी कोमामा गएका छन् । दिल्लीस्थित सैनिक अस्पताललाई उद्धृत गर्दै भारतीय सञ्चारमाध्यम हिन्दुस्तान टाइम्सले मुखर्जी कोमामा गएको उल्लेख गरेको छ ।
केही दिनदेखि अस्पतालमा उपचाररत मुखर्जीको ’भाइटल प्यारामिटर’ भने स्थिर रहेको बताइएको छ । उनको स्वास्थ्य अवस्थामा सुधार नआएको र भेन्टिलेटरमै उपचार भएको पनि अस्पतालले जनाएको छ ।
पूर्वराष्ट्रपति मुखर्जीलाई सोमबार सैनिक अस्पतालमा भर्ना गरिएको थियो । मस्तिष्कको सर्जरी गर्नुभन्दा पहिले गरिएको परीक्षणमा कोरोना संक्रमण पुष्टि भएको छ ।
यसैबीच ’मुखर्जीको मृत्यु’ भएको भन्ने अफवाहको परिवारले खण्डन गरेको छ । मुखर्जीको छोरी शर्मिष्ठा मुखर्जीले ट्वीट गर्दै मुखर्जीको मृत्युको हल्ला अफवाह भएको उल्लेख गरेकी छन् ।
