१५ भाद्र, रौतहट।
रौतहटमा दुई सातामा तीन जनाको हत्या भएपछि जिल्लाबासी त्रसित बनेका छन् ।
श्रृंखलाबद्ध हत्याका घटना भइरहेको रौतहटमा फेरि एक महिलाको शव भेटिएको छ । आइतबार साँझ गढीमाई नगरपालिका वडा नम्बर ३ लक्ष्मीपुर गाउँको उखुबारीमा हत्या गरेर फालिएको अवस्थामा अन्दाजी ४० वर्षीया मित्रा देवीको शव भेटिएको जिल्ला प्रहरी कार्यालय रौतहटले जनाएको छ ।
साउन ३१ गते गरुडा नगरपालिका वाड नंं ८ जिगंडियामा सच नर्सरीमा कार्यरत २० वर्षीय निरन्जन पासवानको घाँटी रेटेर हत्या भएको थियो । भदौ ३ गते राति नौ बजेतिर हनुमान मन्दिरका पुजारी ६५ वर्षीय श्रीराम साहको पनि हत्या भएको थियो ।
जिल्ला प्रहरी कार्यालय रौतहटका एसपी रविराज खड्काका अनुसार लक्ष्मीपुर गाउँका सकल बैठाकी श्रीमती मित्रा देवी १० बजे घांँस काट्न भनेर घरबाट निस्किएकी थिइन् । हत्या भएका ३ वटै क्षेत्र इलाका प्रहरी कार्यालय गरुडाको कार्यक्षेत्रभित्र पर्छ ।
