१७ भदौ, दोहा ।
संयुक्त अरब इमिरेट्स (यूएई)मा एक नेपालीको मृत्यु भएको छ। नेपालमै अन्तिम सास फेर्ने धोको रहेको रुपन्देहीका क्यान्सर पीडित रामसजीवन केवटको यूएईको अलऐनस्थित तवाम अस्पतालमा मृत्यु भएको हो ।
उनी विगत ६ महिनादेखि फक्सोमा क्यान्सर भएर उपचार गराईरहेका थिए । उनलाई विगत तीन महिनादेखि क्याम्ब्रिज मेडिकल तथा रिहाबेसन सेन्टरमा राखिएको थियो। उनलाई फोक्सोमा क्यान्सर भएको बताईएको थियो भने क्यान्सर शरीरको सबै भागमा फैलिसकेकोले निको हुन नसक्ने अस्पतालले बताएको थियो । उनी दुई वर्ष पहिले वैदेशिक रोजगारीको सिलसिलामा युएई पुगेका थिए ।
उनी एनआरएन युएईको पहलमा गत अगष्ट १७ तारिख नेपाल फर्किने तयारीमा थिए तर, नेपाल सरकारको अपरिपक्व निर्णयको कारण यूएई पुगेको नेपाल एयरलाईन्सको उडान अन्तिम समयमा आएर रद्द भएपछि उनी नेपाल फर्कन पाएका थिएनन् । उनलाई नेपाल पुगेर छोराछोरी तथा घरपरिवार भेट्ने ठुलो धोको थियो । उनले अन्ततः युएईमै प्राण त्यागे ।
अहिले रामसजीवन जस्तै हजारौँ नेपाली स्वदेश फर्किन हारगुहार गरिरहेका छन् । तर, सरकारले वास्ता नगर्दा वास्तविक पीडित नेपालीहरुको जन्मभुमि फर्किन चाहना पुरा हुन सकेको छैन ।
