२ कार्तिक, एजेन्सी ।
विश्व स्वास्थ्य संगठन (डब्लूएचओ)ले कोरोनाभाइरसको संक्रमितको उपचारमा रेम्डेसिभिर र हाइड्रोक्सीक्लोरोक्वीन समेत चार औषधि प्रभावकारी नदेखिएको बताएको छ ।
डब्लूएचओले चार विशेष औषधी कोभिड–१९ को उपचारमा कति प्रभावकारी छ भनेर विस्तृत परीक्षण गरेको थियो । रेम्डेसिभिर पहिलो ओषधी थियो जसलाई कोरोनाभाइरसको उपचारमा सबैभन्दा पहिले प्रयोग गरिएको थियो ।
यो औषधी हालै मात्र अमेरिकी राष्ट्रपति डोनाल्ड ट्रम्पको उपचारमा पनि प्रयोग भएको थियो । रेम्डेसिभिरको निर्माता कम्पनी गिलिएडले भने डब्लूएचओको अध्ययनमा आएको परिणामलाई अस्वीकार गरेको छ ।
एक वक्तव्य जारी गर्दै गिलिएडले अध्ययनको निष्कर्ष अन्य अध्ययनसँग मेल नखाएको र यस परिणामको समीक्षा गर्न बाँकी रहेको बताएको छ । डब्लूएचओले सोलिडारिटी ट्रायलका दौरन कुल चार औषधीको परीक्षण गरेको थियो ।
जसमा रेम्डेसिभिर, हाइड्रोक्सीक्लोरोक्वीन, अटो इम्यून ड्रग इन्टरफेरान र एचआईभीको औषधीको संयोजन लोपिनावीर र रिटोनावीर थिए । बेलायतमा कोभिड–१९ का गम्भीर बिरामीको उपचारमा प्रयोग भइरहेको सस्तो स्टेरोइड डेक्सामेथासोनलाई यस अध्ययनमा सामेल गरिएको थिएन ।
३० अलग–अलग राष्ट्रका ५ सय अस्पतालमा ११ हजार २६६ वयस्क बिरामीलमाथि यी चार औषधीको परीक्षण गरिएको थियो । डब्लूएचओको अध्ययनमा यी औषधीहरु बिरामीको ज्यान बचाउन र संक्रमणको दिन कम गर्नमा प्रभावकारी नदेखिएको हो । तर, यस नतिजाको समीक्षा गर्न भने बाँकी रहेको छ ।
डब्लूएचओका मुख्य वैज्ञानिक सौम्या स्वामीनाथनले बुधबार मात्र प्रभावकारी साबित नभएपछि हाइड्रोक्सीक्लोरोक्वीन र लोपिनावीर र रिटोनावीर औषधीको परीक्षण जुनमा नै रोकिएको बताउँदै अन्य औषधीमाथि परीक्षण जारी राखिएको जानकारी दिएकी थिइन् ।
गत महिला गिलिएडले गरेको अध्ययनमा डब्लूएचओको परीक्षणभन्दा फरक नतिजा आएको थियो । गिलिएडले रेम्डेसिभिर औषधी दिँदा संक्रमित ५ दिन अगावै निको हुने दाबी गरेको थियो । गिलिएडले १ हजार बिरामीमा यसको परीक्षण गरेको थियो ।
