२८ कात्तिक, बैतडी ।
दशरथचन्द राजमार्गअन्तर्गत बैतडीको पाटन नगरपालिका-८ खोड्पेमा बिहीबार राति भएको बस दुर्घटनामा मृत्यु भएका ९ जनाकै सनाखत भएको छ ।
मृतकका आफन्तहरुको सहयोगमा जिल्ला प्रहरी कार्यालय बैतडीले उनीहरुको सनाखत गरेको जिल्ला प्रहरी प्रमुख डीएसपी नारायणप्रसाद अधिकारीले बताए ।
दुर्घटनमा परी मृत्यु हुनेमा बैतडीका ३ जना, दार्चुला, कञ्चनपुर र कैलालीका २/२ जना रहेका छन् । डीएसपी अधिकारीका अनुसार मृत्यु हुनेमा बैतडीको दोगडाकेदार गाउँपालिका ६ सित्तडका कविन्द्रप्रसाद जोशी, सोही ठाउँका करनसिंह ऐडी र रण बहादुर चन्द, दार्चुलाको मालिकार्जुन गाउँपालिका–५ डाँडागाउँका जगन्नाथ ओझा, दार्चुला खरकडाका तर्कराज गिरी, कञ्चनपुरको भीमदत्त नगरपालिका १० की बिज्नादेवी धामी, भीमदत्त नगरपालिका ८ तिलाचौरकी कृतिका कार्की रहेका छिन् ।
यस्तै कैलालीको धनगढी उपमहानगरपालिका–१४ फूलबारीका नरेन्द्र चौधरी र धनगढीकै आर्दश टोल बस्ने ऋषिराम चौधरीको पनि दुर्घटनामा मृत्यु भएको छ ।
उपचारको क्रममा डडेल्धुराको अस्पतालमा मृत्यु भएकी किर्तिका कार्की बाहेक अन्य सबै मृतकको शव पोस्टमार्टमको लागि जिल्ला अस्पताल बैतडीमा राखिएको छ ।
दुर्घटनामा ३४ जना घाइते भएका छन् । उनीहरुमध्ये सामान्य घाइतेको डडेलधुरा अस्पतालमा उपचार भइरहेको छ भने गम्भीर घाइतेहरुको धनगढीमा उपचार भइरहेको छ ।
बैतडीको गन्नाबाट महेन्द्रनगरका लागि छुटेको पवनदूत यातायातको ना५ख ५१४१ नम्बरको बस बिहीबार राति साढे १० बजेतिर दुर्घटनामा परेको हो । सानो घुम्तीबाट बस ६०० मिटर जति तल खसेको छ ।
दुर्घटनाको कारण खुल्न सकेको छैन । चालकलाई पनि उपचारका लागि धनगढी पठाइएकाले सोधपुछ गर्न बाँकी रहेको डीएसपी अधिकारीले बताए ।
बसमा ४३ जना यात्रु सवार रहेका उनले बताए ।
