१७ मंसिर, काठमाडौं । सत्तारुढ दल नेकपा भित्रको विवाद कुनै नयाँ होइन । तर हरेक दिनका नेकपाका नेताका अभिब्यक्ति र पार्टी बैठकहरुले नयाँ मोडहरु सृजना गरिरहेका छन ।
मंगलबार बसेको नेकपा सचिवालय वैठकमा दुई अध्यक्षबीच भएको बाझा बाझपछि आज बुधबारका लागि तय भएको वैठकमा प्रधानमन्त्री समेत रहेका एक अध्यक्ष केपी शर्मा ओली गएनन् । यसबाट उत्कर्षमा पुगेको नेकपाको आन्तरिक कलह मत्थर हुने संकेत नै देखिएको छैन । आन्तरिक विवाद समाधानका लागि वैठकमा छलफल पछि समाधान हुने संकेत देखिएकै बेला प्रधानमन्त्री समेत रहेका ओली नै वैठकमा नगएपछि फेरि औपचारिक संवाद केहिदिनका लागि टुंगिएको छ । पार्टी विभाजनको संघारमा पुगेको चर्चा भइरहँदा बालुवाटारमै बस्ने तय भएको बुधबारको वैठक ओली नआएपछि केहि मिनेटमै स्थगित भयो । बुधबार दिउँसो १ बजे बोलाइएको बैठक एक घण्टा ढिला गरी बस्ने भनिएपनि प्रधानमन्त्री अनुपस्थित भएपछि अन्य नेताहरु केही बेर अनौपचारिक रुपमा बैठकमा बसेका थिए । तरपनि ओली वैठकमा नआएपछि सचिवालयको अर्को बैठक मंसिर २० मा र मंसिर १८ का लागि बोलाइएको स्थायी कमिटी बैठक मंसिर २१ सम्मका लागि सरेको छ । सचिवालय बैठकमा अध्यक्ष ओली र अर्का अध्यक्ष पुष्पकमल दाहाल प्रचण्डले एकअर्कालाई आरोप लगाउँदै प्रस्ताव पेस गरेपछि विवाद हुँदै आएको छ । मंगलबारको बैठकमा पनि दुई अध्यक्षबीच चर्काचर्की परेको थियो । कात्तिक २८ गते कार्यकारी अध्यक्ष पुष्पकमल दाहाल प्रचण्डले पेस गरेको प्रस्तावलाई लिएर ओली असन्तुष्ट बनेका हुन । मङ्सिर १३ गतेको बैठकमा अध्यक्ष ओलीले पनि प्रस्ताव पेश गरे । मङ्गलबारको बैठकमा दुई अध्यक्षको प्रतिवेदनमाथि औपचारिक छलफल सुरु त भयो तर अध्यक्ष दाहालले प्रस्ताव फिर्ता नलिएसम्म बैठक बस्नुको औचित्य नभएको ओलीले बताए । प्रस्तावबारे निर्णय गर्ने अधिकार पार्टी बैठकको रहेकोले फिर्ता नगर्ने अडान प्रचण्डको छ । सबै समस्याको समाधान बैठकमार्फत खोज्नुपर्नेमा प्रचण्ड, माधव नेपाल, झलनाथ खनाल, वामदेव गौतमलगायत सचिवालय सदस्यहरूको अडान रहेको छ । यसरी तत्कालका लागि औपचारिक संवाद टुंगिएपछि नेकपाभित्रको विवाद मिल्ने हो कि झनै तन्किने हो थप अन्यौलता सिर्जना भएको छ ।
