१८ मंसिर, तनहुँ । तनहुँको ब्यास नगरपालिकामा मानव निर्मित पुल उद्घाटनका लागि कांग्रेस वरिष्ठ नेता रामच्रन्द्र पौडेल बुधबार दिउँसो गएका थिए । तर उद्घाटन कार्यक्रमको विषयलाई लिएर नेकपाका कार्यकर्ताहरुले अवरोध गर्न खोजेपछि जिल्ला प्रशासन कार्यालयले निषेधाज्ञा नै जारी गर्याे । तर, पौडेलले सत्ताको दुरुपयोग गर्दै कार्यक्रम बिथोल्ने प्रयास भएको भन्दै निषेधाज्ञा खारेज गर्ने घोषणा गर्दे कार्यकर्तासहित पुल उद्घाटनका लागि जाँदै गर्दा उनलाई प्रहरीले ३ घण्टा नियन्त्रणमा लियो । पुल कसले बनायो कसले जस लिन लाग्यो ? यही स्वार्थीपनाले एकाएक राजनीति तरङिगत भयो । पुल उद्घाटन भित्रको फोहोरी राजनीतिको पर्दाफास भयो ।
निर्माण सम्पन्न भएर २ वर्षभन्दा बढि समयदेखि प्रयोग गर्न थालिएको ४५ मिटरको पुल उद्घाटन गर्ने निहुँमा अहिले नेपालका सत्तापक्ष र प्रतिपक्षबीच द्वन्द्व देखिएको छ । नेपाली राजनीतिमा पक्षपोषण र विरोधका लागि ठूलो विषय नै नचाहिने संस्कार त छ नै तर पुल उद्घाटन गर्ने विषयले यति ठूलो चर्चा पाएको भने पहिलो पटक नै हो । पुल उद्घाटन गर्न तनहुँ पुगेका आफ्ना नेतालाई प्रहरीले पक्राउ गरेको विषयलाई प्रतिपक्ष नेपाली कांग्रेसले सरकारको प्रवृत्तिको रुपमा हेरेको छ भने तनहुँ प्रशासनले निषेधाज्ञा तोडेकोमा पक्राउ गरिएको भनेर स्वभाविक प्रतिक्रिया जनाएको छ । घटना सामान्य हो, तनहुँ सदरमुकाम आडैको व्यास १, १० र ११ जोड्ने तालघारी–दुम्सीचौर पोख्रेलफाँट मोटरमार्ग अन्तर्गतको बुल्दी खोलामा २०७३ वैशाखमा काम सुरु भएर २०७५ कात्तिकमा दुई करोड ५४ लाख रुपैयाँ लागतमा ४५.६ मिटर लामो पुल निर्माण सम्पन्न भयो । निर्माण सम्पन्न भएको २ वर्षसम्म पनि औपचारिक कार्यक्रम गरेर उद्घाटन नगरेपनि आउजाउमा सहजताका लागि बनाइएको पुल प्रयोग गर्न पाएर स्थानीय खुशी थिए । तर एकाएक राजनीतिक विवादको विषय बन्यो । कांग्रेसले वरिष्ठ नेता रामचन्द्र पौडेलबाट पुलको उद्घाटन गर्न चाहन्थ्यो भने नेकपाले संघीय सांसद कृष्णकुमार श्रेष्ठ श्रेष्ठबाट । कांग्रेसको नेतृत्व रहेको व्यास नगरपालिकाले पुल उद्घाटनको कार्यक्रम राखेपछि नेकपा निकट युवा संघ सडकमै उत्रियो । आफनो सरकार छ अनि बनेको पुल उद्घाटनमा चाँही प्रतिपक्षदलका नेतालाई बोलाउने यही अहमता सायद देखिएको हुन सक्छ युवाहरुमा । दुबै पक्षबीच झडपकै अवस्था सिर्जना भएपछि प्रशासनले निषेधाज्ञा जारी गर्यो । निषेधाज्ञा अवज्ञा गर्दै पौडेलकै नेतृत्वमा जुलुससहित पुल उद्घाटन कार्यक्रम हुन खोजेपछि प्रहरीले पौडेलसहित केहीलाई पक्राउ परी ३ घन्टापछि छाड्यो । स्थानीय स्तरमा यस्त घटना विगतमा पनि नभएका होइनन् तर तीन घण्टासम्म कुनैपनि शीर्ष नेताहरुलाई प्रहरी नियन्त्रणमा रहनु परेको थिएन । पौडेल पक्राउ परेको विषयलाई कांग्रेसले सरकारको प्रवृत्तीमाथि प्रश्न उठाइरहँदा जनता भने राजनीतिक दलको गैरराजनीतिक र मर्यादा विपरितको हर्कतमाथि प्रश्न उठाइरहेका छन् । आम जनताको प्रश्न कानूनको पालना र कानूनको कार्यान्वयनमै केन्द्रित छ । गर्नुपर्ने ठाँउमा कानूनको कार्यान्वयन नभएर जनता पीडित छन भने मान्दिनु पर्नेले कानून नमानिदिएपछि पनि जनता पीडित छन । जनताको सहजताका लागि निर्माण गरिएको पुल जनताले प्रयोग गरिरहँदा उद्घाटन गर्ने र जस लिने लोभका कारण दुबै राजनीतिक दलको चरित्र माथि प्रश्न उठेको छ । यहाँ कोही पनि पानीमाथि ओभाने देखिने स्थिती रहेको छैन । जे नहुनु पर्ने थियो त्यही भयो ४५.६ मिटर पुलमाथि फोहोरी राजनीति भयो । सामान्य निहुँमा विवाद खडा गर्ने र आन्दोलन गर्ने अवसरका रुपमा लिने दुवै राजनीतिक दलको यस्तो व्यवहार कसका लागि, के का लागि ?
