२२ मंसिर, एजेन्सी ।
भारतमा १२ दिनदेखि कृषि कानून फिर्ता गर्नुपर्ने माग राख्दै किसानहरुले आन्दोलन सुरु गरेका छन् ।
यो आन्दोलनमा देशविदेशबाट समर्थन मिलिरहेको छ। उग्र बन्दै गएको किसान आन्दोलनलाई समर्थन गर्दै पञ्जाबका खेलाडीहरुले पनि आज आफ्नो अवार्डहरु फिर्ता गर्ने भएका छन्।
पद्मश्री र अर्जुन अवार्ड जितेका कुस्तीका खेलाडी करतार सिंहले आफूले किसान आन्दोलनमा समर्थन जनाउँदै अवार्डहरु राष्ट्रपति रामनाथ कोविन्दलाई फिर्ता गर्ने जानकारी दिए।
त्यसैगरी बक्सिङका बिंजेन्द्र सिंहले खेल रत्न, गुरबख्त सिंह सधुले द्रोणाचार्य अवार्ड, बास्केटबलका सज्जन सिंह चिमाले अर्जुन अवार्ड, हकीका रामबीर कौरले पनि अर्जुन अवार्ड फिर्ता गर्ने जनाएका छन् ।
किसान आन्दोलनका क्रममा प्रहरीले दमन गरेका तस्विरहरु आएपछि केन्द्रमा रहेको मोदी सरकारको आलोचना भइरहेको छ। यसबीच हजारौं किसानहरु दिल्लीको सीमा आएर सरकारलाई कानून फिर्ता लिन दबाब दिइरहेका छन्।
