२२ मंसिर, सुनसरी ।
अनुयायी बलात्कारकाे आराेपमा कारागारमा रहेका धर्मगुरु सिद्धबाबा भनिने कृष्णबहादुर गिरी रिहा हुने भएका छन् । सुनसरी जिल्ला अदालतले कृष्णदासलाई रिहा गर्ने निर्णय गरेकाे हाे ।
सोमबार न्यायाधीश अर्जुनप्रसाद कोइरालाको इजलासले सरकारको अभियोग दाबी नठहर्ने उल्लेख गर्दै गिरीलाई सफाइ दिएको हो । सिद्धबाबाले सफाइ पाउने ठहर भएको जिल्ला अदालत सुनसरीका श्रेस्तेदार नगेन्द्रकेशरी पोखरेलले जानकारी दिए । सरकारी वकिलले पेशी सार्न दिएको निवेदनको बेवास्ता गर्दै सोमबार नै सिद्धबाबाको मुद्धामा सुनुवाई गरिएको थियो ।
सरकारी वकिल कार्यालयले भने महान्यायाधिवक्ता कार्यालयमा पठाएको मिसिल आइनसकेको र यसअघि सिद्धबाबाको वकिल हेर्ने सरकारी वकिल सरुवा भएकाले सोमबारको पेशी सार्न माग गरेको थियो ।
तर न्यायाधीश कोइरालाको इजलासले पेसी नसर्ने भन्दै सुनुवाई अघि बढाएको थियो । पेसी सार्ने पत्र दर्ता नभएपछि सरकारी वकिलको कार्यालय भने सोमबार बहस गर्न गएको थिएन ।
सिद्धबाबाविरुद्ध एक अनुयायीले आफूलाई बलात्कार गरेको भनी जाहेरी दिएकी थिइन् ।
