२३ मंसिर, एजेन्सी ।
अमेरिकाको राष्ट्रपतिमा निर्वाचित जो बाइडेनले आफ्नो प्रशासनको रक्षा मन्त्रीका रुपमा लोयड अस्टिनलाई चयन गरेको अमेरिकी सञ्चारमाध्यमले जनाएका छन् ।
अस्टिन अवकास प्राप्त आर्मी जनरल हुन् । ६७ वर्षका अस्टिन रक्षा मन्त्रालय पेन्टागनको जिम्मेवारी सम्हाल्ने पहिलो अश्वेत अमेरिकी हुने छन् ।
बाराक ओबामा प्रशासनमा अमेरिकाको केन्द्रीय कमाण्डको नेतृत्व गरेका जनरल अस्टिनको नियुक्तिका लागि सिनेटको स्वीकृति चाहिन्छ ।
राष्ट्रिय सुरक्षा टिम घोषणाको दुई हप्तापछि बाइडेनले रक्षा मन्त्रीका रुपमा अस्टिनलाई चयन गरेका अमेरिकी सञ्चारमाध्यमले जनाएका छन् । बाइडेन र जनरल अस्टिनले अहिलेसम्म यसबारे सार्वजनिक रुपमा कुनै पनि टिप्पणी गरेका छैनन् ।
यसअघि अमेरिकी सञ्चारमाध्यमले रक्षा मन्त्रीमा बाइडेनले पेन्टागनकी वरिष्ठ अधिकारी मिशेल फ्लानोयीलाई चयन गर्ने दाबीसहितका खबर प्रकाशित गरेका थिए । उनी मनोनित भएको भए रक्षा मन्त्री हुने पहिलो महिला बन्ने थिइन् ।
गएको नोभेम्बर ३ मा भएको चुनावमा बाइडेनले रिपब्लिकन राष्ट्रपति डोनाल्ड ट्रम्पलाई पराजित गरेका हुन् । ट्रम्पले बिना प्रमाण धाँधलीको आरोप लगाउँदै हार स्वीकार गरेका छैनन् ।
बाइडेनले अमेरिकाको ४६ औँ राष्ट्रपतिका रुपमा आउँदो जनवरी २० मा शपथ लिने छन्।
