२७ मंसिर, काठमाडाैँ ।
अन्तर्राष्ट्रिय क्रिकेट परिषद (आइसीसी) ले सन् २०२३ मा दक्षिण अफ्रीकामा हुने टि२० महिला विश्वकपका लागि छनोटको विवरण सार्वजनिक गरेको छ ।
मलेसियामा हुने ८ टोली सम्मिलित एसिया छनोट प्रतियोगितामा नेपालले प्रतिस्पर्धा गर्नेछ । सेप्टेम्बर २० देखि २६ २०२१ मा हुने उक्त छनोट प्रतियोगितामा नेपाल र आयोजक मलेसियासँगै भुटान, चीन, हङकङ, कुवेत, म्यानमार र यूएई रहनेछन् । उक्त छनोटको विजेताले विश्वकप छनोटको अन्तिम चरणमा स्थान बनाउनेछ ।
विश्वकप छनोटको अन्तिम चरण सन् २०२२ मा हुनेछ । उक्त प्रतियोगितामा ८ टोलीले प्रतिस्पर्धा गर्नेछन् । शीर्ष दुई टोलीले विश्वकपमा खेल्नेछन् । विश्वकपमा कुल १० टोलीले प्रतिस्पर्धा गर्नेछन् ।
यसपटक क्षेत्रीय छनोटमा ८ नयाँ टोलीले सहभागिता जनाउँदै छन् । ७ महिना लामो छनोट प्रक्रियामा १ सय १५ खेल हुने आइसिसीले जनाएको छ । छनोटमा कुल ३७ टोलीको सहभागिता रहनेछ । क्षेत्रीय छनोटबाट अगाडी बढ्ने नसकेको मध्यबाट वरीयतामा शीर्षस्थानमा रहने एक टोलीले पनि विश्वकप छनोटको अन्तिम चरणमा स्थान बनाउनेछ ।
