१८ पुस, काठमाडौं ।
सहरी विकासमन्त्री प्रभु साहले रौतहटबाट महोत्तरी जाने क्रममा सर्लाहीको हरिवन चोकमा भएको दुर्घटनालाई झुक्किएर भएको बताएका छन्। उनले आफू चढेको गाडीबाट झुक्किएर लडेको व्यक्तिलाई केही नभएको र ढुक्क भएर हिँडेको विषयलाई केही अनलाइन मिडियाले अतिरञ्जित ढंगले प्रचार गरेको आरोप लगाएका छन्।
भन्त्री साहले फेसबुकमार्फत् भनेका छन् ‘आज रौतहटबाट महोत्तरी जाने क्रममा सर्लाहीको हरिवन चौकमा म चढेको गाडीबाट झुक्किएर लडेको व्यक्तिलाई केही पनि नभएकाले ढुक्क भएर हिँडेको सामान्य विषयलाई ‘ठक्कर दिएर भागे’ भनेर मेरो बदनाम गर्ने उद्देश्यले केही अनलाइन मिडियाले अतिरंजित ढंगले प्रचार गर्नु र सर्लाही प्रहरीलाई मेरो यात्राबारे सम्पूर्ण जानकारी हुँदाहुँदै पनि नेपाल प्रहरीले मन्त्री प्रभु साहको गाडी ‘खुलेको’ भन्ने भ्रमपूर्ण वक्तव्य दिन गैरजिम्मेवार रूपमा प्रस्तुत भएको दु:खद विषयप्रति मेरो गम्भीर ध्यानाकर्षण भएको छ‚’ उनले लेखेका छन्‚ ‘सुरक्षा दिनु र सवारी सहजीकरण गर्नुको सट्टा सर्लाही प्रहरीले अफवाह फैलाउने काम गर्नु आपत्तिजनक छ।’
मन्त्री साह सवार ना १ झ ३८४२ नम्बरको जिपले शनिबार सर्लाहीको हरिवनमा एक पैदल यात्रुलाई ठक्कर दिएर भागेको थियाे । गाडीको ठक्करबाट घाइते भएका पैदलयात्री लालबन्दी नगरपालिका–८ का ३० वर्षीय बच्चु तामाङको स्वाभिमान अस्पताल हरिवनमा उपचार भइरहेको छ । घाइते तामाङको अवस्था सामान्य छ ।
प्रत्यक्षदर्शी हरिवनस्थित चतुर्भुजेश्वर जनता बहुमुखी क्याम्पसका स्ववियु सभापति प्रज्वल ढुंगानाका अनुसार पश्चिमबाट पूर्वतर्फ झण्डा हल्लाउँदै आएको गाडीले ठक्कर दिएको थियो । दुर्घटना लगत्तै घाइतेको उद्धार गर्न लाग्दा जिप भागेको बताइएकाे छ ।
